कोरोनाच्या तिसऱ्या लाटेविरोधात लढण्यास राज्य सरकार सक्षम- अजित पवार
पुणे – कोरोनाच्या दुसऱ्या लाटेत संपूर्ण भारत होरपळून निघत असताना तिसऱ्या लाटेचीही शक्यता वर्तवण्यात येत आहे. या तिसऱ्या लाटेविरोधात लढण्यासाठी राज्य सरकार सक्षम असल्याची ग्वाही उपमुख्यमंत्री अजित पवार यांनी दिली. ते आज पुण्यात माध्यमांशी बोलत होते. त्यांनी आज पुण्यातील कोरोना परिस्थितीचा आढावा घेतला.
कोरोनाच्या पहिल्या लाटेपक्षा दुसरी लाट अतिभयंकर ठरतेय. त्यातच, तज्ज्ञांकडून कोरोनाच्या तिसऱ्या लाटेची चिंता व्यक्त केली जात आहे. तिसऱ्या लाटेबद्दल पवारांना विचारणा केली असता राज्य तिसऱ्या लाटेशी लढण्यास सक्षम असल्याचं त्यांनी सांगितलं. राज्यात लहान मुलांसाठी कोविड सेंटर्स उभारण्याच्ं काम सुरु आहे. पुण्यातल्या येरवड्यातही लहान मुलांसाठीचं १०० बेड्स कोविड सेंटर आजपासून सुरु झालं असल्याची माहिती त्यांनी दिली. त्याचबरोबर लसींच्या मागणीसाठी केंद्राकडे पाठपुरावा करणं सुरु आहे. पुणे, मुंबई महानगरपालिकांनी लसींसाठी ग्लोबल टेंडर काढलं असल्याचंही त्यांनी सांगितलं.
पुण्यातल्या कोरोना स्थितीचा आढावा घेतल्यावर त्यांनी जिल्ह्याबद्दलही माहिती दिली. पुण्यात आता पॉझिटिव्ह रुग्णांची संख्या कमी होत आहे. तर बरे होऊन घरी परतणाऱ्या रुग्णांची संख्या वाढली आहे. त्यामुळे पुण्यात आता सर्व प्रकारचे बेड्स असल्याची माहिती त्यांनी दिली आहे. त्याचबरोबर आता जिल्ह्यामध्ये ऑक्सिजन, रेमडेसिविर यांचा तुटवडा नसल्याचंही त्यांनी सांगितलं. मात्र, ग्रामीण भागातली रुग्णसंख्या अजूनही अपेक्षेप्रमाणे आटोक्यात आली नसल्याची खंत त्यांनी व्यक्त केली आहे.
म्युकरमायकोसिसच्या रुग्णांच्या उपचारासाठी लागणाऱी इन्जेक्शन्स मात्र राज्याकडे पुरेशी उपलब्ध नाहीत. त्यांचा तुटवडा आहे. मात्र, त्यासाठी आम्ही केंद्राकडे पाठपुरावा करत आहोत, असंही त्यांनी सांगितलं. या इन्जेक्शन्ससाठी थेट उत्पादक कंपन्यांशी संपर्क साधण्याचा प्रयत्न करत आहोत. मात्र, त्यांना सर्व इन्जेक्शन्स केंद्राकडे देणं बंधनकारक असल्याने ते थेट देऊ शकत नसल्याची माहितीही पवारांनी यावेळी दिली.
