एसटी बँकेची निवडणूक लांबणीवर?; ६० हजार मतदार बँकेचे थकबाकीदार
मुंबई |
‘गरीब एसटी कर्मचाऱ्यांची श्रीमंत बँक,’ अशी एसटी बँकेची ख्याती आहे. एसटी संपात सहभागी झाल्याने ९० हजार मतदारांपैकी जवळपास ६० हजार मतदार बँकेचे थकबाकीदार झाले आहेत. थकबाकीदारांना मतदान करण्याचे अधिकार नाहीत. यामुळे एसटी बँकेची निवडणूक पुढे ढकलण्याच्या हालचाली सुरू झाल्या आहेत. सध्या या बँकेवर राष्ट्रवादी काँग्रेस प्रणित महाराष्ट्र एसटी कामगार संघटना यांचे वर्चस्व असून या संघटनेने निवडणूक प्राधिकरणाला पत्र पाठवले आहे.
दोन हजार कोटींहून अधिक ठेवी असलेल्या एसटी बँकेच्या राज्यात ५० शाखांत मिळून एकूण ९० हजार सभासद आहेत. एसटीचे राजकारणात बँकेचे विशेष महत्त्व असल्याने सर्वपक्षीय कामगार संघटनांमध्ये बँकेवर वर्चस्व मिळवण्यासाठी जोरदार रस्सीखेच आहे. सहा महिन्यांच्या संप काळात संपकऱ्यांना पगार मिळालेला नाही. परिणामी त्यांना कर्जाचे हप्ते फेडणे शक्य झाले नाही. सहकारी संस्था अधिनियमानुसार थकबाकीदारांना मतदानामध्ये मतदान करण्याचे अधिकार नाहीत. केवळ ३० हजार कर्मचारी मतदानास पात्र आहेत. मतदान प्रक्रिया पारदर्शी पार पडण्यासाठी एसटी कर्मचाऱ्यांनी निवडणूक पुढे ढकलण्याची मागणी केली होती. या मागणीनुसार बँकेची पंचवार्षिक निवडणूक पुढे ढकलण्याबाबतचे पत्र निवडणूक प्राधिकरणाला पाठवण्यात आले आहे, अशी माहिती महाराष्ट्र एसटी कामगार संघटनेचे अध्यक्ष संदीप शिंदे यांनी दिली.
एसटी संप मिटला असून सध्या बहुतांश कर्मचारी कामावर हजर झाले आहेत. बँकेची निवडणूक प्रक्रिया पूर्ण करण्यासाठी राज्यातील बँकेच्या सभासदांच्या मतदार याद्या तयार करण्याचे काम सुरू आहे. सभासदांना मतदान करता येणार नसल्याने एसटी बँकेची निवडणूक लांबणीवर पडण्याची शक्यता वर्तवण्यात येत आहे.
