शिवसेनेचे १४ मे रोजी शक्तिप्रदर्शन; मुंबईत होणार उद्धव ठाकरेंची सभा
मुंबई : शिवसेनेतर्फे सुरू करण्यात आलेल्या शिवसंपर्क अभियाना अंतर्गत येत्या १४ मे रोजी वांद्रे-कुर्ला संकुलात (बीकेसी) विराट सभेचे आयोजन करण्यात आले आहे. पक्षप्रमुख आणि मुख्यमंत्री उद्धव ठाकरे हे या विराट सभेला संबोधित करणार असून, या सभेचा ‘टिझर’ रविवारी शिवसेनेतर्फे जाहीर करण्यात आला. हिंदुत्त्वाचा मुद्दाच या सभेचे प्रमुख आकर्षण असणार आहे. दरम्यान, आगामी मुंबईसह इतर महापालिका निवडणुकीच्या पार्श्वभूमीवर या सभेच्या माध्यमातून शिवसेना जोरदार शक्तिप्रदर्शन करणार आहे.
शिवसेनेतर्फे गेल्या काही दिवसांपूर्वीच शिवसंपर्क अभियानाला सुरुवात करण्यात आली होती. या अभियाना अंतर्गत राज्याच्या विविध जिल्ह्यांत अनेक कार्यक्रमांचे आयोजन करण्यात आल्यानंतर शिवसेनेने मुख्यमंत्री आणि पक्षप्रमुख उद्धव ठाकरे यांची सभा घेण्याचे निश्चित केले आहे. त्यानुसार येत्या १४ मे रोजी संध्याकाळी ७ वाजता बीकेसी येथे ही सभा घेतली जाणार आहे. या सभेत शिवसेना पक्षप्रमुख आणि मुख्यमंत्री उद्धव ठाकरे यांच्यासह शिवसेनेतील अनेक बडे नेते मार्गदर्शन करणार असल्याचे सांगितले जात आहे.
दरम्यान, या सभेचा टिझर शिवसेनेने रविवारी टि्वटवरून जाहीर केला आहे. अवघ्या १५ सेकंदाच्या या टिझरच्या सुरुवातीलाच शिवसेनाप्रमुख बाळासाहेब ठाकरे यांचे भाषण दिसते. मी शिवसेनाप्रमुख जरूर, पण तुमची ताकद माझ्यासोबत आहे. म्हणूनच मी शिवसेनाप्रमुख आहे, असे बाळासाहेब ठाकरे बोलताना दिसत आहेत. तर साहेबांवर श्रध्दा असणाऱ्या प्रत्येक शिवसैनिकाने खऱ्या हिंदुत्त्वाचा हुंकार ऐकायला यायलाच पाहिजे, असे आवाहन या टिझरच्या माध्यमातून करण्यात आले आहे. त्यामुळे राज्यात सध्या गाजत असलेल्या हिंदुत्त्वाच्या मुद्दांवर मुख्यमंत्री उद्धव ठाकरे हे नेमके काय भाष्य करणार याकडे महाराष्ट्राचे लक्ष लागून राहिले आहे.
