तेव्हा शिवसेनेच्या मंत्र्यांच्या खिशात राजीनामे असायचे, नाना पटोलेंचा बंडखोरांना मागील सरकारचा दाखला
मुंबई : काँग्रेस प्रदेशाध्यक्ष नाना पटोले यांनी संजय राऊत यांच्या वक्तव्यावर प्रतिक्रिया दिली आहे. संजय राऊत यांचं ते वक्तव्य शिवसेनेचा अंतर्गत प्रश्न आहे, आम्ही त्यावर बोलणार नाही, असं नाना पटोले म्हणाले. राज्यात महाविकास आघाडी सरकार कायम राहिल. महाविकास आघाडी सरकारमध्ये काँग्रेस देखील असेल, नाना पटोले म्हणाले. केंद्रातल्या भाजप सरकारचा ईडीच्या धाकानं सरकार पाडण्याचा प्रयत्न यशस्वी ठरणार नाही. राज्यात महाविकास आघाडी सरकार राहील, असं नाना पटोले म्हणाले. मागच्या सरकारच्या काळात शिवसेनेचे मंत्री खिशात राजीनामे घेऊन फिरत होते, हे या सरकारच्या काळात घडलं असा आव कुणी आणायची गरज नाही, असं नाना पटोले म्हणाले.
२०१९ च्या विधानसभा निवडणुकीत विरोधी पक्षाचा कौल जनतेनं दिला होता. आम्ही विरोधी पक्षात बसायच्या तयारीत आहोत, आम्हाला त्याचं काय वाटत नाही. महाविकास आघाडी सरकार असेल तर काँग्रेस त्यामध्ये असेल, असं नाना पटोले म्हणाले. शिवसेनेचा अंतर्गत प्रश्न आहे. शिवसेनेचे आमदार गुवाहाटीमध्ये बसले आहेत. भाजपचा त्यामध्ये हात आहे. संजय राऊत यांनी त्यांच्या आमदारांसाठी केलेलं वक्तव्य आहे. आम्हाला शिवसेनेच्या अंतर्गत प्रश्नात पडायचं नाही, असं नाना पटोले म्हणाले.
जनतेनं आम्हाला विरोधी पक्षामध्ये बसण्याचा कौल दिला आहे. आमची ती मानसिकता झाली आहे, असं नाना पटोले म्हणाले. भाजप सत्तेत नको म्हणून सोनिया गांधी यांनी सरकार स्थापन करण्यासंदर्भात भूमिका घेतली आहे.
जयंत पाटील काय म्हणाले?
काल वर्षा बंगल्यावर पवारसाहेब उद्धव ठाकरे यांना भेटायला गेले होते, त्यावेळी काय चर्चा झाली नाही. आज शिवसेनेनं असं विधान केलं त्यात गुवाहाटीमध्ये अडकलेल्या आमदारांनी मुंबईत यावं, त्यांनी त्याचं मत मांडल्यानंतर विचार करु,असं म्हणाले आहेत. गुवाहाटीमध्ये जे आमदार गेले आहेत, त्यांनी पाठिंबा काढू असं म्हटलेलं नाही. गुवाहाटीमधील आमदारांनी नवा पक्ष काढलेला नाही. संजय राऊत यांचं वक्तव्य शिवसेनेचा अंतर्गत प्रश्न आहे.
शिवसेनेचा इतिहास असा आहे की ज्यांनी पक्ष सोडला त्यांचा पुढील निवडणुकीत पराभव झाला. शिवसेनेला आज आमदार किती आहेत याची गरज नाही पण सरकार टिकवण्यासाठी आवश्यक असलेलं संख्याबळ पाहावं लागेल,असं जयंत पाटील म्हणाले.
