breaking-newsक्रिडाताज्या घडामोडी

शाहबाजची शानदार गोलंदाजी, मॅक्सवेलचे अर्धशतक; बंगळुरुची हैदराबादवर 6 धावांनी मात

चेन्नई –शाहबाज अहमदने एका षटकात घेतलेल्या 3 विकेट्सच्या जोरावर रॉयल चॅलेंजर्स बंगळुरुने काल सनरायजर्स हैदराबादवर 6 धावांनी दणदणीत विजय मिळवला. ग्लेन मॅक्सवेलच्या अर्धशतकाच्या जोरावर रॉयल चॅलेंजर्स बंगळुरुने सनरायजर्स हैदराबादला विजयासाठी 150 धावांचे आव्हान दिले होते. मात्र हैदराबादला बंगळुरुच्या गोलंदाजांच्या भेदक माऱ्यासमोर 20 षटकांत 9 विकेट्स गमावून 143 धावाच करता आल्या.

सामन्याच्या सुरुवातीला हैदराबादने नाणेफेक जिंकत बंगळुरूला प्रथम फलंदाजीचे निमंत्रण दिले. मग बंगळुरूकडून विराट कोहली आणि देवदत्त पडीक्कलने डावाची सुरुवात केली. मात्र तिसऱ्याच षटकात भुवनेश्वरने पडीक्कलला तंबूचा मार्ग दाखवला. त्याने 11 धावा केल्या. तर काही धावांच्या अंतरानंतर तिसऱ्या क्रमांकावर खेळायला आलेला शाहबाज अहमदही (14) बाद झाला. त्याला नदीमने राशिद खानकरवी झेलबाद केले. त्यानंतर विराट कोहली आणि ग्लेन मॅक्सवेलने बंगळुरूला सावरले. 10 षटकात बंगळुरूने 2 बाद 63 धावा केल्या. संघाला शतकाजवळ नेताना जेसन होल्डरने विराटला बाद केले. विराटने 33 धावा केल्या. विराटनंतर एबी डिव्हिलियर्स मैदानात आला, मात्र राशिद खानने त्याला स्थिरावण्याची संधीच दिली नाही. वॉर्नरकडे झेल देऊन तो एका धावेवर बाद झाला. बंगळुरूने 15व्या षटकात आपले शतक पूर्ण केले. शतकानंतर बंगळुरूने वॉशिंग्टन सुंदर(8) आणि डॅनियल ख्रिश्चन (1) या आपल्या अजून दोन फलंदाजांना गमावले. राशिद खानने सुंदरला झेलबाद केले. मनीष पांडेने सुंदरचा अप्रतिम झेल टिपला. राशिदने आपल्या 4 षटकात फक्त 18 धावा देत 2 बळी घेतले. तर, टी. नटराजनने ख्रिश्चनला यष्टीपाठी झेलबाद केले. दुसऱ्या बाजूला असलेल्या ग्लेन मॅक्सवेलने फटकेबाजी करत संघाला सन्मानजनक धावसंख्या गाठून दिली. मॅक्सवेलने 5 चौकार आणि 3 षटकारांसह 59 धावांची खेळी केली. शेवटच्या चेंडूवर तो बाद झाला. हैदराबादकडून जेसन होल्डरने सर्वाधिक 3 बळी घेतले, तर राशिद खानने त्याच्या 4 षटकात 18 धावा देत 2 फलंदाजांना माघारी धाडले.

बंगळुरूने दिलेले 150 धावांचे आव्हान घेऊन हैदराबादकडून डेव्हिड वॉर्नर आणि वृद्धिमान साहा यांनी डावाची सुरुवात केली. बंगळुरूचा गोलंदाज मोहम्मद सिराजने दुसऱ्याच षटकात साहाला तंबूचा मार्ग दाखवला. त्यानंतर मनीष पांडे आणि वॉर्नर यांनी डाव सांभाळला. या दोघांनी पहिल्या पॉवरप्लेमध्ये 6 षटकात 1 बाद 50 धावा उभारल्या. त्यानंतर पांडे आणि वॉर्नर यांनी आपली अर्धशतकी भागीदारी पूर्ण केली. 13व्या षटकात वॉर्नरने 31 चेंडूत अर्धशतक पूर्ण केले. अर्धशतकानंतर जेमिसनला मोठा फटका खेळण्याच्या नादात वॉर्नर बाद झाला. त्याने 7 चौकार आणि एका षटकारासह 54 धावा केल्या. शेवटच्या 4 षटकात 35 धावांची गरज असताना हैदराबादने जॉनी बेअरस्टो, मनीष पांडे आणि अब्दुल समद या तीन फलंदाजांना शाहबाज अहमदच्या एकाच षटकात गमावले. बेअरस्टो 13, तर पांडे 38 धावा काढून माघारी परतला. समदला भोपळाही फोडता आला नाही. त्यानंतर आलेला विजय शंकरही हर्षल पटेलच्या गोलंदाजीवर विराटकडे झेल देऊन बाद झाला. राशिद खानने सिराजला पहिल्याच चेंडूवर षटकार ठोकत धावांचे अंतर कमी केले, मात्र याच षटकात जेसन होल्डर झेलबाद झाला. शेवटच्या षटकात हैदराबादला 16 धावांची गरज होती. हर्षल पटेलने टाकलेल्या या षटकात हैदराबादला 9 धावाच घेता आल्या. बंगळुरूकडून अहमदने 2 षटकात 7 धावा देत 3 बळी घेतले, तर सिराज आणि पटेलला प्रत्येकी 2 बळी मिळाले.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button