मध्यप्रदेशने आरक्षण कसं टिकवलं ते पाहा, राज्य सरकारच्या मदतीला तयार: पंकजा मुंडे
औरंगाबाद: मध्यप्रदेश सरकारने ज्या प्रकारे ओबीसी आरक्षण टिकवून दाखवलं, त्याप्रमाणे राज्य सरकारनेही पावलं उचलावी. काही मदत लागल्यास मी स्वत: मध्यप्रदेशात जायला तयार आहे. मी लागेल ती मदत करेन, असं आवाहन भाजप नेत्या पंकजा मुंडे यांनी राज्य सरकारला केलं आहे. तसेच, ओबीसी आरक्षण सुरक्षित करण्यासाठी ओबीसी नेते कमी पडत आहेत. ओबीसी आरक्षण टिकवून ठेवणारे लोक कमी पडत आहेत, असंही त्या म्हणाले.
ओबीसी आरक्षणाशिवाय निवडणुका होऊ नये – पंकजा मुंडे
“ओबीसी आरक्षणाशिवाय निवडणुका होऊ नये असंच मला वाटतं, मध्यप्रदेशचा निर्णय झाल्यानंतर मला असं वाटतंय की सकारात्मक दृष्ट्या हा निर्णय हाताळला गेला तर आपण मध्यप्रदेशच्या धर्तीवर हे आरक्षण चिकवून ठेवू शकतो, त्यामुळे सरकारने जर पावसाच्या कारणामुळे निवडणुका पुढे ढकलाव्या असं सांगितलं असेल तर तो वेळ इम्पेरिकल डेटासाठी वापरावा आणि ओबीसी आरक्षण सुरक्षित करून द्यावं”, असं त्या म्हणाल्या.
“राज्य सरकारने याकडे गांभीर्याने पाहिलं नाही त्यामुळे ओबीसी आरक्षण आमच्या हातातून गेलं, हा फार मोठा गुन्हा आहे. मी बोलले होते की ओबीसी आरक्षणाला धक्का नसून धोका आहे”, अशी टीकाही पंकजा मुंडेंनी केली. “मध्यप्रदेशात त्यांनी ओबीसी आरक्षण कशापद्धतीने दिलं हे आपल्या राज्याने घ्यावं, अशी सूचना मी ऑलरेडी केली आहे. ही सूचना विधानसभेतही मांडली होती. ती स्वीकारली गेली होती. काही मदत लागली राज्य सरकारला तर नक्की करू, मी आवाहनही करते सरकारला की मध्यप्रदेशमध्ये जे काम झालं त्यात काही मदत हवी असेल तर तेही मी करायला तयार आहे”, असं आवाहान त्यांनी ठाकरे सरकारला केलं आहे.
‘राज्य सरकारची मानसिकता ओबीसी आरक्षण टिकवून ठेवण्याची नाही’
“राज्य सरकारची मानसिकता ओबीसी आरक्षण टिकवून ठेवण्याची, सुरक्षित करण्याची नाहीये. कारण, त्यांना जे सुरक्षित करायचं असतं ते करतातच. ओबीसी आरक्षण सुरक्षित करण्यासाठी ओबीसी नेते कमी पडत आहेत. ओबीसी आरक्षण टिकवून ठेवणारे लोक कमी पडत आहेत”, असं म्हणत त्यांनी सरकारमधील ओबीसी नेत्यांना सुनावलं आहे.
