स्क्रिप्ट भाजपची, भोंगा भाजपचा आणि टाळ्याही स्पॉन्सर, कालची सभा राज ठाकरेंची नव्हतीच : राऊत
मुंबई |”भाजपचा लाऊड स्पीकर काल शिवतीर्थावर वाजत होता. काल राज ठाकरेंची नाही, भाजपची सभा झाली. राज ठाकरेंना कालची स्क्रिप्ट भाजपने लिहून दिली होती आणि सभेला भाजपचाच भोंगा होता. एवढंच नाही त्यांना मिळणाऱ्या टाळ्या देखील स्पॉन्सर होत्या. अक्कलदाढ एवढी उशीरा कशी काय येते?”, अशा एक ना अनेक शब्दात शिवसेना खासदार संजय राऊत यांनी राज ठाकरेंची खिल्ली उडवली.
मनसे अध्यक्ष राज ठाकरे यांनी कालच्या पाडवा मेळाव्यात सुमारे तासभर झंझावाती भाषण केलं. आपल्या भाषणात ते मुख्यमंत्री उद्धव ठाकरे, शरद पवार यांच्यावर तुटून पडले. राष्ट्रवादीच्या नवाब मलिक आणि छगन भुजबळांचा समाचार घेतला तर मुख्यमंत्रिपदावरुन झालेल्या राजकारणाला उद्धव ठाकरेंना दोषी ठरवत त्यावरुनही राजकीय फटकेबाजी केली. उल्लेखनीय बाब म्हणजे राज ठाकरेंनी पाडवा मेळाव्याच्या भाषणात भाजपविरोधात एकही शब्द काढला नाही. हीच बाब अनेकांना खटकली. खासदार संजय राऊत यांनी देखील हीच गोष्ट अधोरेकित करत राज ठाकरेंना टोमणे मारले.
संजय राऊत म्हणाले, “भाजप आपली मळमळ राज ठाकरे यांच्या भोंग्यातून उतरवत आहेत. पण मुख्यमंत्री उद्धव ठाकरे चांगलं काम काम करत आहे. राज्य चांगल्या प्रकारे पुढे नेत आहेत. काल मराठी भाषा भवनाचं उद्घाटन झालं. मेट्रो मुंबईकरांच्या सेवेत आली. राज ठाकरेंना हे दिसलं नाही का? ते आपले मशीदेवरचे भोंगे उतरवतायत”, असा टोला संजय राऊतांनी लगावला.
“काल शिवतीर्थावर राज ठाकरेंची नाही तर भाजपची सभा झाली. कालची स्क्रिप्ट भाजपने लिहून दिली होती. सभेला भाजपचाच भोंगा होता. एवढंच नाही तर कालच्या सभेत टाळ्याही स्पॉन्सर होत्या. अक्कलदाढ येते हे माहिती होतं, पण एवढ्या उशीरा….?”, असं म्हणत राज ठाकरे यांच्या भूमिकेवर संजय राऊतांनी प्रश्नचिन्ह उपस्थित केलं.
मनसे प्रमुख राज ठाकरे यांनी महाराष्ट्रातील जातीपातीच्या राजकारणाला राष्ट्रवादी काँग्रेस आणि शरद पवार जबाबदार असल्याचा गंभीर आरोप केला. तसेच १९९९ ला राष्ट्रवादी पक्षाचा जन्म झाल्यानंतर महाराष्ट्रात जातीपातीचं राजकारण मोठ्या प्रमाणात सुरु झाल्याचंही म्हटलं. राज यांच्या या आरोपावरही संजय राऊतांनी त्यांना टोमणा हाणला. “तुम्हीही पवारांच्या चरणाजवळ सल्लामसलत करण्यासाठी जात होताच की… कशाला उगीच आपण टोलेजंग माणसावर बोलायचं”, असं राऊत म्हणाले.
