पुण्यात राडा, राष्ट्रवादीच्या महिला पदाधिकाऱ्याला भाजपा कार्यकर्त्यांची मारहाण, सुप्रिया सुळेंकडून तीव्र शब्दात निषेध
पुणे : पुण्यात केंद्रीय मंत्री स्मृती इराणी यांच्या कार्यक्रमात जोरदार राडा झाला. स्मृती इराणी यांच्या कार्यक्रमात महागाईच्या मुद्द्यावरुन राष्ट्रवादीने आंदोलन केलं. स्मृती इराणी यांच्या ताफ्यावर राष्ट्रवादीच्या महिला कार्यकर्तींनी अंडी भिरकावली. बालगंधर्व रंगमंदिरातील कार्यक्रमात भाजप कार्यकर्ते आणि राष्ट्रवादीचे कार्यकर्ते एकमेकांसमोर आले. दरम्यान, दोन्ही पक्षांच्या कार्यकर्त्यांमध्ये तुफान राडा झाला. यावेळी भाजपच्या महिला कार्यकर्त्यांनी राष्ट्रवादीच्या विभागीय अध्यक्षा वैशाली नागवडे यांना मारहाण केल्याचा आरोप आहे. त्यांना सध्या ससून रुग्णालयात उपचारासाठी दाखल करण्यात आलं आहे. दरम्यान राष्ट्रवादीच्या महिला पदाधिकाऱ्यावर झालेल्या हल्ल्याचा राष्ट्रवादीच्या खासदार सुप्रिया सुळे यांनी निषेध केलाय. तर राज्याचे उपमुख्यमंत्री अजित पवार यांनी राष्ट्रवादीचे पुणे शहाराध्यक्ष प्रशांत जगताप यांना फोन करुन संबंधित प्रकरणाची माहिती घेतली तसेच कार्यकर्त्यांची विचारपूस केली.
सुप्रिया सुळे यांच्याकडून हल्ल्याचा निषेध
“शांततेच्या मार्गाने महागाईच्या विरोधात आपला विरोध प्रकट करीत असताना राष्ट्रवादी महिला काँग्रेसच्या पदाधिकारी वैशाली नागवडे यांना भाजपाच्या पुरुष पदाधिकाऱ्याने मारहाण केल्याचे स्पष्ट दिसत आहे. कोणत्याही परिस्थितीत एक पुरुष महिलेला मारहाण करतो हे अजिबात स्वीकारार्ह नाही. या अशा प्रकारच्या भ्याड हल्ल्याचा तीव्र निषेध”
राष्ट्रवादीच्या वैशाली नागवडे यांना मारहाण, शहराध्यक्ष प्रशांत जगताप यांची फेसबुक पोस्ट
राष्ट्रवादी महिला काँग्रेसच्या विभागीय अध्यक्षा सौ. वैशालीताई नागवडे यांना भारतीय जनता पार्टीच्या काही कार्यकर्त्यांनी केलेली मारहाण दुर्दैवी असून या घटनेचा पुणे शहर राष्ट्रवादी काँग्रेस पार्टी तीव्र शब्दात निषेध करते. मुळात भारतीय जनता पार्टीच्या कार्यकर्त्यांच्या संस्कार व पक्षाची संस्कृती या निमित्ताने सर्वांसमोर आली असून आमचा महाराष्ट्र पोलिस प्रशासनावर पूर्ण विश्वास आहे. पोलिस प्रशासनाने तात्काळ संबंधित आरोपींना अटक करत कठोर कायदेशीर पावले उचलावीत, अशी मागणी प्रशांत जगताप यांनी फेसबुक पोस्टमधून केली.
पक्ष शिस्तीची टिमकी मिरवणाऱ्या देवेंद्र फडणवीस, प्रदेशाध्यक्ष चंद्रकांत पाटील महिलांच्या मारहाणीची ही शिकवण देता का तुम्ही शाखेत? चित्रा वाघ आता या महिला भगिनीच्या मागे तुम्ही उभ्या राहणार का?, असा सवाल प्रशांत जगताप यांनी विचारला.
