To The Point : ‘‘सोशल मीडिया’’ सह राजकीय वर्तुळात आमदार महेश लांडगे यांचा ‘‘जलवा’’

पिंपरी-चिंचवड । अविनाश आदक । भाजपाचे प्रखर हिंदुत्ववादी नेते म्हणून ओळख असलेले आमदार महेश लांडगे यांची ओळख महाराष्ट्रभरात पोहोचली आहे. किंबहुना, सर्वसमावेशक हिंदूत्व आणि पिंपरी-चिंचवडमधील 2014 पासून राबवलेले विकास प्रकल्प याची सांगड घालत त्यांनी ‘‘विकासाभिमूख हिंदूत्व’’ अशी ‘पॉलिटिकल लाईन’ त्यांनी निश्चित केली आहे, यावर शिक्कामोर्तब झाले आहे.

भोसरी विधानसभा मतदार संघामध्ये 2014 मध्ये विधानसभा निवडणुकीत अपक्ष निवडून आलेले आमदार महेश लांडगे यांनी सुरूवातीला तत्कालीन मुख्यमंत्री देवेंद्र फडणवीस यांच्या नेतृत्त्वात भाजपाचे सहयोगी सदस्यत्व स्वीकारले. त्यानंतर 2017 च्या महापालिका निवडणुकीपूर्वी त्यांनी अधिकृतपणे भारतीय जनता पार्टीत प्रवेश केला. ‘व्हीजन-2020’ ची घोषणा करीत त्यांनी 2019 ची विधानसभा आणि त्यानंतर 2024 ची निवडणूक भाजपाकडून लढवली आणि जिंकली आहे.

विधानसभा सभागृहामध्ये अफजल खानाचा पुरस्कार करणारे आमदार अबु आझमी यांच्या विरोधात आक्रमकपणे हिंदुत्वाची भूमिका मांडणे. कुदळवाडी येथे भारतातील सर्वात मोठी अतिक्रमण कारवाई करण्याचे जाहीर समर्थन करणे किंबहुना, राष्ट्र सुरक्षेच्या मुद्यावर कारवाईची जबाबदारी स्वीकारणे. यासह लव्ह जिहाद, लॅन्ड जिहाद आणि धर्मांतर यासह गोसेवा- गोसंवर्धन सारख्या मुद्यांवर सक्रीय काम करणारे आमदार लांडगे कायम चर्चेत असतात.

धर्मवीर छत्रपती संभाजी महाराज यांचे जगातील सर्वांत उंच शिल्प ‘‘स्टॅच्यू ऑफ हिंदुभूषण’’ उभारण्यात आले. त्याचे संकल्पक आमदार महेश लांडगे आहेत. या स्मारकामुळे आमदार लांडगे यांची ओळख महाराष्ट्रासह भारतभरात झाली. कारण, शिव-शंभू विचारांच्या युवकांनी ‘हिंदुभूषण’चे सोशल मीडियावर प्रचंड स्वागत केले आहे.

दरम्यान, भोसरी येथील ऐतिहासिक गावजत्रा मैदानावर आमदार लांडगे यांचा वाढदिवस अभिष्ठचिंतन सोहळा उत्साहात साजरा झाला. गेला महिनाभर त्यांच्या वाढदिवसानिमित्त 100 हून अधिक कार्यक्रम- उपक्रम झाले. त्यांच्या समर्थकांनी सोशल मीडिया, फलक आणि होर्डिंगद्वारे जोरदार ब्रँडिंग केले.त्याची चर्चा केवळ शहरातच नव्हे, तर जिल्ह्यातही जोरदार झाली.

अभिष्ठचिंतन सोहळ्याचा सर्वपक्षीयांची उपस्थिती…

आमदार लांडगे यांच्या अभिष्ठचिंतन सोहळ्यात राज्यस्तरीय आणि स्थानिक अनेक मत्तबर व्यक्ती उपस्थित राहून आमदारांना शुभेच्छा दिल्या. मुख्यमंत्री देवेंद्र फडणवीस, उपमुख्यमंत्री एकनाथ शिंदे, भाजप प्रदेशाध्यक्ष रविंद्र चव्हाण, खासदार छत्रपती उदयनराजे भोसले, तसेच कॅबिनेट मंत्री, विधान परिषदेचे सदस्य आणि सामाजिक व सांस्कृतिक क्षेत्रातील प्रतिष्ठित व्यक्तींनी शुभेच्छा संदेश पाठवले.यावेळी आमदार लांडगे यांनी आपल्या वाढदिवसाचे कार्यक्रम सामाजिक कार्य आणि घरकामगार माता-भगिनींना समर्पित केले, तसेच उपस्थितांना शहराच्या विकासासाठी सकारात्मक ऊर्जेने काम करण्याचा संदेश दिला. विशेष म्हणजे, शहरातील सर्वपक्षीय नेत्यांनी लांडगे यांना शुभेच्छा दिल्या आहेत. शहरासह पश्चिम महाराष्ट्रात बॅनर्स, होर्डिंग्ज आणि वृत्तपत्र जाहिरातींचा धुरळा पाहायला मिळाला.

‘‘विकासाभिमूख हिंदुत्व’’चे जोरदार ब्रँडिंग…

शहरातील सर्व वृत्तपत्रे, न्यूज पोर्टल्स, यु-ट्यूब चॅनेल्समध्ये जाहीराती आणि आटिकल्स प्रसिद्ध झाली आहेत. तसेच, जिल्हा आणि पश्चिम महाराष्ट्रातील प्रमुख शहरांसह सर्व तालुक्यांमध्ये आमदार महेश लांडगे समर्थकांनी बॅनर आणि होर्डिंग लक्षवेधी ठरली आहेत. संभाजी महाराजांचे जगातील सर्वांत उंच स्टॅच्यू ऑफ हिंदुभूषण, इंद्रायणी थडी महोत्सव, हिंदुभूषण क्रीडा महोत्सव, पर्यावरण व नदी संवर्धन, नमामी इंद्रायणी, रिव्हर सायक्लोथॉन, शास्तीकर माफी, वेस्ट टू एनर्जी, मेट्रो विस्तार, महामार्ग रुंदीकरण, महापालिका भवन, पोलीस आयुक्तालय, न्यायालय संकुल, आंद्रा-भामा पाणीपुरवठा, रस्त्यांचा विकास, प्राधिकरण प्रॉपर्टी फ्री होल्डचा निर्णय, मल्टिस्पेशालिटी हॉस्पिटल, संविधान भवन, आंतरराष्ट्रीय दर्जाची लायब्ररी, आंतरराष्ट्रीय दर्जाचे क्रीडा संकुल, राष्ट्रीय सुरक्षा व हिंदुत्व जागरूकता, लव्ह-जिहाद, लॅन्ड-जिहाद, धर्मांतरविरोधी पुढाकार, देव- देश- धर्म व संस्कृती संवर्धन असे मुद्दे आणि विकास प्रकल्प अचूकपणे ‘हाईलाईट’ केले आहेत. प्रत्येक प्रकल्प – जलस्त्रोत, आरोग्य, शिक्षण, क्रीडा, संस्कृती, इन्फ्रास्ट्रक्चर – शहराचा आणि महाराष्ट्राचा गौरव वाढवेल अशी साद घालत ‘‘विकासाभिमुख हिंदुत्व – प्रगतीसह हिंदुत्वाची जाणीव’’ अशी सर्वसमावेशक वाटचाल आमदार लांडगे आणि त्यांच्या समर्थकांनी अधोरेखित केली आहे.