महाराष्ट्र प्रदेश युवक काँग्रेसच्या सरचिटणीसांसह अन्य १०० पदाधिकारी राजीनामा देणार

पुणे : महाराष्ट्र विधानसभा निवडणुकीत काँग्रेसला मोठ्या पराभवाचा सामना करावा लागला होता. यानंतर काँग्रेसचे अनेक नेते, पदाधिकाऱ्यांनी रामराम करत सत्ताधारी पक्षात प्रवेश केला. आता महापालिका निवडणुका तोंडावर आल्या आहेत. त्यातच आता पुन्हा एकदा राज्यात पक्षांतराचे वारे वाहू लागले आहेत. यात पुणे देखील यात मागे राहिलेले नाही. काही दिवसांपूर्वी कसबा विधानसभा मतदारसंघाचे माजी आमदार रवींद्र धंगेकर यांनी शिवसेना शिंदे गटात प्रवेश केला. त्यानंतर आता काँग्रेसला देखील गळती लागल्याची चर्चा पुण्यात रंगली आहे. त्यातच आता महाराष्ट्र प्रदेश युवक काँग्रेसच्या सरचिटणीसांसह अन्य १०० पदाधिकारी राजीनामा देणार आहेत.

येत्या २-३ दिवसात राजीनामा देणार
महाराष्ट्र प्रदेश युवक काँग्रेसचे सरचिटणीस रोहन सुरवसे पाटील आणि एनएसयुआय पुणे सरचिटणीस कृष्णा साठे यांच्यासह पक्षातील अन्य १०० पदाधिकारी येत्या २-३ दिवसात राजीनामा देणार आहेत, अशी माहिती सूत्रांनी दिली आहे. गेल्या काही दिवसांपासून विरोधी पक्षातील पदाधिकारी सत्ताधारी पक्षांमध्ये प्रवेश करताना पाहायला मिळत आहे. भारतीय जनता पक्ष, राष्ट्रवादी काँग्रेस अजित पवार गट तसेच शिवसेना शिंदे गटात अनेक पदाधिकारी प्रवेश घेत आहेत.

हेही वाचा –  शहराच्या सुरक्षेचा महापालिकेवर भार ?

काँग्रेस पक्षाला रामराम ठोकणार
त्यातच काही दिवसांपासून सुरवसे पाटील हे काँग्रेस पक्षाला रामराम ठोकणार अशी चर्चा रंगली होती. आता या पक्ष प्रवेशाची तारीख निश्चित झाली आहे. येत्या २ ते ३ दिवसांमध्ये सुरवसे पाटील यांच्यासह युवक काँग्रेसचे १०० पदाधिकारी राजीनामा देणार आहेत. हे सर्वजण दुसऱ्या पक्षात प्रवेश करणार आहेत. येत्या आठवड्यात हे सर्व पदाधिकारी राष्ट्रवादी काँग्रेस अजित पवार गटात प्रवेश घेणार असल्याची माहिती सूत्रांनी दिली आहे. मात्र अद्याप याबद्दल अधिकृत माहिती समोर आलेली नाही.

महाईन्यूज-X वर फॉलो करा : महाईन्यूजला instagram वर फॉलो करा