‘हे देवेंद्र फडणवीसांचे सरकार, जास्त कराल तर कापून काढू’; भाजप नेत्याचे वादग्रस्त वक्तव्य
Devendra Fadnavis | नगरपरिषद आणि नगरपंचायत निवडणुकांच्या पार्श्वभूमीवर राजकीय आरोप–प्रत्यारोपांना ऊत आला असताना भाजपचे सावनेरचे आमदार आशीष देशमुख यांच्या एका वक्तव्याने खळबळ उडाली आहे. निवडणूक प्रचार सभेत बोलताना देशमुख यांनी विरोधकांना थेट ‘जास्त कराल तर कापून काढू’ अशी धमकी दिल्याचा व्हिडिओ सध्या सोशल मीडियावर व्हायरल झाला आहे.
सभेत देशमुख म्हणाले, “हे देवेंद्र फडणवीसांचे सरकार आहे. ते गृहमंत्री आहेत. ते नागपूरचे आहेत. त्यामुळे जास्त कराल तर कापून काढू.” या वक्तव्यावेळी महसूलमंत्री चंद्रशेखर बावनकुळेही उपस्थित होते.
हेही वाचा : राज्यातील निवडणुकांबाबत आज सर्वोच्च न्यायालयात सुनावणी, जिल्हा परिषद निवडणुकांचे भवितव्य ठरणार
देशमुख यांनी हा वादग्रस्त व्हिडिओ त्यांच्या स्वतःच्या इन्स्टाग्राम अकाऊंटवरही अपलोड केला आहे. दोन दिवसांपूर्वी कळमेश्वर येथे काँग्रेसच्या कार्यकर्त्यांकडून भाजप कार्यकर्त्याला मारहाण झाल्याची घटना घडली होती. त्या प्रकरणात काँग्रेस उमेदवाराच्या पतीचे नाव चर्चेत आले होते. त्याला प्रत्युत्तर देताना देशमुख यांनी ही तीव्र भाषा वापरली असल्याचे सांगितले जात आहे. या वक्तव्यामुळे निवडणूक वातावरण आणखी तापले असून विरोधकांकडून तीव्र प्रतिक्रिया येण्याची शक्यता आहे.
