पुणे : कर्नाटकमध्ये महाराष्ट्र राज्य मार्ग परिवहन महामंडळाच्या (एसटी) बस चालकाला मारहाण झाल्यामुळे दोन्ही राज्यांतील बस सेवा ठप्प झाली आहे. महाराष्ट्रातून कर्नाटकात जाणाऱ्या २५० आणि पुण्यातून जाणाऱ्या आठ ते नऊ बस बंद आहेत. पोलिसांनी सीमेवर दोन्ही राज्यातील बस रोखल्या आहेत. त्यामुळे दोन्ही राज्यादरम्यानची सार्वजनिक बससेवा बंद पडली आहे.
महाराष्ट्रातील एसटी महामंडळाच्या चालकास कानडी भाषा येत नसल्याच्या कारणावरून कर्नाटकात मारहाण झाली. त्यामुळे महाराष्ट्रातील नागरिकांनी कर्नाटकातून येणाऱ्या बसला काळे फासले होते, तसेच शिवसेना उद्धव बाळासाहेब ठाकरे पक्षाकडूनही पुण्यात जोरदार निदर्शने करण्यात आली.
हेही वाचा – पिंपरी- चिंचवड महानगरपालिकेच्या महत्त्वाच्या सेवांचा लाभ घेता येणार घरबसल्या!
या मारहाणीमुळे राज्यात वातावरण तापले आहे. त्यामुळे पोलिसांनी दोन्ही राज्यांच्या सार्वजनिक बस सीमेवरच थांबविल्या आहेत. दोन्ही राज्यांच्या दरम्यानची सार्वजनिक वाहतूक व्यवस्था रविवार सकाळपासून पूर्णतः बंद झाली आहे. त्याचा फटका प्रवाशांना बसला आहे.
महाराष्ट्रातून दिवसाला साधारण अडीचशे बस कर्नाटकात जातात, तर कर्नाटकातून देखील तेवढ्याच बस महाराष्ट्रात येतात. पुण्यातून कर्नाटकातील बेळगाव, कलबुर्गी, विजापूर या शहरांसाठी आठ ते नऊ बस धावतात. याशिवाय सहा ते सात बस कर्नाटकातून पुण्यात येतात. या सर्व बस बंद ठेवण्यात आल्या आहेत. कोल्हापूर जिल्ह्याच्या सीमेवर बस थांबविल्या आहेत. त्यामुळे पुण्यातून कर्नाटकात जाण्यासाठी कोल्हापूर सीमेपर्यंत जावे लागते. तेथून पुन्हा कर्नाटकाच्या बसने प्रवास करावा लागत असल्याने प्रवाशांची मात्र गैरसोय होत आहे.
महाईन्यूज-X वर फॉलो करा : महाईन्यूजला instagram वर फॉलो करा
