पीएफआय तरुणांना दहशतवादी गटांमध्ये सामील होण्यासाठी प्रवृत्त करत आहे, एनआयएने जारी केला अहवाल

नवी दिल्ली । महाईन्यूज । विशेष प्रतिनिधी ।

पीएफआयचा भंडाफोड करणाऱ्या एनआयएच्या कारवाईला ‘ऑपरेशन ऑक्टोपस’ असे नाव देण्यात आले. या अंतर्गत 22 सप्टेंबर रोजी NIA ने 11 राज्यांमध्ये PFI च्या अनेक ठिकाणांवर छापे टाकले. यावेळी 106 पीएफआय सदस्यांना अटक करण्यात आली. हा छापा एनआयए, ईडी आणि राज्य पोलिसांची संयुक्त कारवाई होती. राष्ट्रीय तपास संस्थेने (एनआयए) या प्रकरणी आपला अहवाल प्रसिद्ध केला असून, देशभरात पसरलेल्या पॉप्युलर फ्रंट ऑफ इंडिया (पीएफआय) या इस्लामिक दहशतवादी संघटनेच्या कार्यालयांवर छापे टाकण्यात आल्याचा दावा केला आहे. यावेळी जप्त केलेल्या कागदपत्रांमधून आक्षेपार्ह साहित्य सापडले आहे. विशेष एनआयए न्यायालयासमोर सादर करण्यात आलेल्या रिमांड अहवालात 10 जणांच्या कोठडीची मागणी करण्यात आली आहे. कट्टरपंथी इस्लामिक संघटनेने तरुणांना दहशतवादी गटात सामील होण्यास प्रवृत्त केल्याचा आरोपही एजन्सीने केला आहे. या दहशतवादी गटांमध्ये लष्कर-ए-तैयबा आणि इस्लामिक स्टेट ऑफ इराक अँड सीरिया (ISIS) यांचाही समावेश आहे.

एनआयएने अहवालात म्हटले आहे की, पीएफआयच्या जागेवर टाकलेल्या छाप्याला ऑपरेशन ऑक्टोपस असे नाव देण्यात आले होते ज्यात एकूण 300 अधिकारी सामील होते. छापेमारीच्या वेळी त्यांना शांत राहण्यास सांगण्यात आले. या कारवाईत पीएफआयच्या 100 सदस्यांना अटक करण्यात आली असून, सुमारे 200 जणांना ताब्यात घेण्यात आले आहे. ईडी आणि एनआयएच्या म्हणण्यानुसार, पीएफआयचे सदस्य देशविरोधी कारवायांमध्ये गुंतले होते. एनआयएने पाच गुन्हे दाखल केल्यानंतर ही कारवाई करण्यात आली. सूत्रांकडून मिळालेल्या माहितीनुसार, हे सर्व टेरर फंडिंग, तरुणांसाठी प्रशिक्षण शिबिरे आणि लोकांमध्ये कट्टरता पसरवण्यासाठी केले जात आहे. महाविद्यालयाच्या प्राध्यापकाचा हात कापण्यासारखे गुन्हेगारी हिंसक कृत्य पीएफआयने केले असल्याचे तपास संस्थेने म्हटले आहे.