breaking-newsआरोग्यताज्या घडामोडीमहाराष्ट्रमुंबई

परिचारिकांचे आज, उद्या काम बंद; बेमुदत आंदोलनाचा इशारा

मुंबई : करोना संसर्गाच्या काळामध्ये वैद्यकीय सेवा देणाऱ्या परिचारिकांनी सरकारच्या कंत्राटी पद्धतीने पदे भरण्याच्या निर्णयाविरोधात आझाद मैदान येथे आंदोलन सुरू केले आहे. हा प्रश्न सोडवण्यासाठी महाराष्ट्र राज्य परिचारिका संघटनेबरोबर बुधवारी झालेल्या आरोग्यमंत्र्यांच्या बैठकीमध्ये समाधानकारक तोडगा न निघाल्याने दोन दिवस पूर्णपणे कामबंद ठेवण्याचा निर्णय घेतला आहे. वित्तीय मागण्यांशिवाय इतर मागण्यांचा विचार करण्यात येईल, पदनाम बदलाच्या संदर्भातील विचार करू, असे सांगण्यात आले. मात्र इतर मागण्यांबद्दल समाधानकारक चर्चा न झाल्याने आज, गुरुवारपासून राज्यात दोन दिवस कामबंद आंदोलन पुकारण्यात येणार आहे, असे संघटनेच्या राज्य सरचिटणीस मनीषा शिंदे यांनी सांगितले.

अपुऱ्या मनुष्यबळाचा प्रश्न सोडवण्यासाठी सरकारने कंत्राटी पद्धतीने पदे भरण्यास मान्यता दिली आहे. परिचारिकांना या निर्णयातून वगळण्याच्या मागणीचा पुनरुच्चार करत महाराष्ट्र राज्य परिचारिका संघटनेद्वारे पुकारण्यात आलेले हे आंदोलन सुरू राहील. या कामबंद आंदोलनानंतरही ही समस्या सुटली नाही तर हे आंदोलन बेमुदत सुरू ठेवण्यात येईल, असा इशारा संघटनेकडून देण्यात आला आहे.

काय आहेत मागण्या?

राज्यातील सर्व शासकीय वैद्यकीय महाविद्यालयांमध्ये परिचारिका संवर्गतील कर्मचाऱ्यांची निवासस्थाने जुनी आहेत. परिचारिकांची निवासस्थाने राखीव ठेवण्यात यावीत किंवा नव्याने बांधून द्यावीत.

राज्यातील सर्व वैद्यकीय महाविद्यालयांमध्ये पाळणाघरे उपलब्ध व्हावीत, तसेच सार्वजनिक आरोग्य विभागामध्ये राज्य शुश्रूषा कक्षाची स्थापना करावी. विद्यार्थी परिचारिकांच्या विद्यावेतनात वाढ करावी. वैद्यकीय शिक्षण व सार्वजनिक आरोग्य विभागातील परिचारिकांना केंद्र सरकारप्रमाणे राज्यातील परिचारिकांच्या वैयक्तिक, सामाजिक दर्जा उंचावण्यासाठी पदनामामध्ये बदल करावा.

आरोग्यव्यवस्थेवर परिणामाची शक्यता

परिचारिकांच्या अनुपस्थितीमुळे राज्यातील आरोग्यव्यवस्थेवर परिणाम होण्याची शक्यता नाकारता येत नाही. आप्तकालीन विभागासह इतर सर्व वैद्यकीय विभागामध्ये परिचारिका सेवा देणार नाहीत, याची कल्पना वैद्यकीय शिक्षण विभागासह संचालकांना देण्यात आल्याचे संघटनेच्या वतीने सांगण्यात आले.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button