मुंबई |
एखाद्या भागात पावसाळ्यात तुंबलेले पाणी, दरड कोसळण्याच्या घटना, वाहतूक कोंडी यासह विविध प्रकारच्या धोक्यांचा इशारा मुंबईकरांना आता घरबसल्या किंवा प्रवासात असतानाच आपल्या मोबाइलवर मिळणार आहे. महापालिकेने सुरू केलेल्या ‘डिझास्टर मॅनेजमेंट एमसीजीएम’ अ‍ॅपचे अद्ययावतीकरण करण्यात येत आहे. त्यामुळे मार्गातील धोक्यांचा इशारा आधीच मिळाल्याने पुढील नियोजन करणे मुंबईकरांना सुलभ होणार आहे. मुंबईत पावसाळ्यात दरड कोसळणे, इमारती पडणे, विविध भागात पाणी साचणे, झाडे कोसळणे, वाहतूक कोंडी यासह छोट्या-मोठ्या दुर्घटना घडण्याची शक्यता असते. वातावरणात सतत होणाऱ्या बदलामुळे अनेक संकटे येत असतात. हे धोके जीवघेणे ठरू शकतात. मुंबईत सध्या २२४ अतिधोकादायक इमारती असून पावसाळ्यात या इमारतींना धोका निर्माण होऊ शकतो. पालिकेचे हे अ‍ॅप मोबाइलवर डाउनलोड केल्यास सर्व प्रकारच्या धोक्यांची आगाऊ माहिती मिळू शकणार आहे.
धोकादायक इमारत, दरड कोसळण्याचा धोका किंवा पाणी तुंबलेले असल्यास आपल्याला तसा संदेश मोबाइलवर येईल. त्यामुळे आपण या मार्गावरून जाणे टाळू शकतो. प्ले स्टोअरमधून हे अ‍ॅप आपल्याला डाउनलोड करता येते, अशी माहिती पालिकेचे अतिरिक्त आयुक्त सुरेश काकाणी यांनी दिली. आपत्कालीन परिस्थितीत रुग्णालये, अग्निशमन केंद्र, पोलिस ठाणे तसेच पालिकेच्या विभाग कार्यालयाच्या नियंत्रण कक्षाचे संपर्क क्रमांक अॅपवर असणार आहेत. यावर क्लिक केल्यास संबंधित ठिकाणाशी लगेचच संपर्क साधणे शक्य होणार आहे. मुंबई शहर व उपनगरात होत असलेल्या पावसाचा दर १५ मिनिटांचा, प्रत्येक तासाचा तसेच २४ तासांचा अद्ययावत अहवाल, पाणी तुंबलेली ठिकाणे, तात्पुरत्या निवाऱ्याची ठिकाणे अॅपवरून समजून घेता येतील. पालिका क्षेत्रातील महत्त्वाच्या ठिकाणांनुसार तिथे पडलेल्या पावसाची माहिती, हवामान पर्यायामध्ये वाऱ्याचा वेग, वाऱ्याची दिशा, हवेतील दमटपणाचे प्रमाण, पर्जन्यमापनाची तीव्रता समजणार आहे.
- काय करावे, काय करू नये?
नैसर्गिक व मानवनिर्मित आपत्तीत नागरिकांनी काय करावे व काय करू नये याची माहिती, तसेच समुद्रातील ४.५ मीटरपेक्षा अधिक उंचीच्या लाटा, भरती आणि ओहोटी, हवामानाचा अंदाज ही माहिती एका क्लिकवर मुंबईकरांना मिळणार आहे.
- सोशल मीडियाशी संपर्क
एखाद्या दुर्घटनेत अडकल्यास, संकटात सापडल्यास या अॅपवरून संपर्क केलेल्या क्रमांकावर तसेच फेसबुक, ट्विटर, इन्स्टाग्राम अशा सोशल मीडियावरून संदेश जाणार आहे. त्यामुळे तातडीची मदत मिळू शकेल, असा विश्वास पालिकेने व्यक्त केला आहे.
