कुख्यात गुंड अप्पा लोंढे खून प्रकरण: सहा जणांना दुहेरी जन्मठेप
पुणे
कुख्यात गुंड अप्पा लोंढे खून प्रकरणातील सहा आरोपींना मकोका न्यायालयाने दुहेरी जन्मठेप व प्रत्येकी दोन हजार रुपये दंडाची शिक्षा सुनावली. विशेष न्यायाधीश एस. एन. शिरसीकर यांनी हा आदेश दिला. संतोष भिमराव शिंदे (वय ३४), निलेश खंडू सोलनकर (वय ३०), राजेंद्र विजय गायकवाड (वय २४), आकाश सुनिल महाडीक (वय २०), विष्णू यशवंत जाधव (वय ३७), नागेश लक्ष्मण झाडकर (वय २७) अशी शिक्षा झालेल्यांची नावे आहे. कट रचणे आणि खून करणे या कलमांखाली आरोपींना दोषी ठरवत न्यायालयाने ही शिक्षा सुनावली.
याप्रकरणी विशेष सरकारी वकील विकास शाह यांनी ४२ साक्षीदार तपासले. त्यामध्ये पुणे ग्रामीण पोलिस अधिक्षक डॉ. अभिनव देशमुख यांनी नोंदविलेला आरोपींचा कबुली जबाब, बॅलेस्टीक तज्ज्ञ डॉ कुतुबुद्दीन मुलाणी यांची साक्ष आणि शव विच्छेदन अहवाल महत्त्वाचा ठरला. परिस्थितीजन्य पुराव्यांच्या आधारे आरोपींना अधिकाधिक शिक्षा ठोठावण्यात यावी असा युक्तिवाद विशेष सरकारी वकील शाह यांनी केला. न्यायालयाने तो मान्य केला. फिर्यादीतर्फे ऍड. सुहास कोल्हे यांनी कामकाज पाहिले.