‘कधीही हाक मारावी, छत्रपती त्याच्या सेवेसाठी हजर राहणार’; संभाजीराजे कोणाला म्हणाले

मुंबई: संभाजीराजे छत्रपती यांनी राज्यसभा निवडणुकीतून माघार घेतली आहे. मुंबईत झालेल्या पत्रकार परिषदेत राजेंनी ही मोठी घोषणा केली. निवडणुकीत घोडेबाजार होऊ नये म्हणून निवडणूक लढवणार नसल्याचे त्यांनी स्पष्ट केले. पण ही माघार नव्हे तर माझा स्वाभिमान असल्याचे ते म्हणाले.

राज्यसभा निवडणुकीसाठी महाराष्ट्रातून सहा उमेदवार निवडूण जाणार आहेत. यापैकी सहाव्या जागेसाठी संभाजीराजे यांनी अपक्ष उमेदवार म्हणून उभे राहणार असल्याची घोषणा संभाजीराजेंनी पुण्यात केली होती. त्यानंतर शिवसेनेकडून त्यांना पक्षप्रवेश करण्याची ऑफर आली होती. यासंदर्भात आज संभाजीराजेंनी पत्रकार परिषद घेऊन त्यांची भूमिका जाहीर केली.

कोणत्याही पक्षात प्रवेश न करण्यावर ठाम असल्याने मी शिवसेनेची ऑफर नाकारल्याचे सांगत संभाजीराजे यांनी ज्या आमदारांनी मला पाठिंबा दिला आणि माझ्या अर्जावर सही केली, त्यांचे आभार मानले. या सर्व आमदारांच्या पाठिशी मी आयुष्यभर उभे राहणार असल्याचे संभाजीराजेंनी पत्रकार परिषदेत सांगितले. ज्या आमदारांनी माझ्या अर्जावर सही केली. मी आयुष्यभर त्यांच्या पाठीशी राहणार. त्यांनी कधीही हाक मारावी, छत्रपती त्याच्या सेवेसाठी हजर राहणार, अशा शब्दात संभाजीराजे यांनी आमदारांना पाठिंबा दिला.