नागपूरः वाद सोडविण्यासाठी गेलेल्या प्रॉपर्टी डिलरची हत्या करण्यात आली. ही घटना मंगळवारी सायंकाळी ७.४५ वाजताच्या सुमारास पारडी पोलिस स्टेशन हद्दीतील माँ अंबेनगर येथे घडली. याप्रकरणी पोलिसांनी खुनाचा गुन्हा दाखल करून युवकाला अटक केली आहे. त्याच्या अल्पवयीन साथीदारालाही पोलिसांनी ताब्यात घेतले आहे.
नेमलाल पतीराम गडे (वय ५८) असे मृतकाचे तर विनोद ऊर्फ गुड्डू तोरण निर्मलकर (वय ३२) असे अटकेतील मारेकऱ्याचे नाव आहे. गुड्डू याचा पानठेला आहे. मुकुंदा ऊर्फ बाबा मते (वय ३९), नेमलाल व गुड्डू मित्र आहेत. पोलिसांनी दिलेल्या माहितीनुसार, काही दिवसांपूर्वी मुकुंदा यांच्या पत्नी माहेरी गेल्या. मंगळवारी सायंकाळी नेमलाल, मुकुंदा विजय व अन्य मित्रांनी घरी फिश करी बनविण्याचे ठरविले. यात गुड्डूलाही सहभागी केले. काही जण एचबी टाउन परिसरातील लखन सावजी भोजनालयात थांबले.
मुकुंदा व नेमलाल हे बाजारात मासोळी खरेदी करायला गेले. त्यानंतर मुकुंदा हा सावजी भोजनालयात तर नेमलाल घरी गेले. सावजी भोजनलायात दारू पिताना गुड्डूने शिवीगाळ करायला सुरुवात केली. त्यामुळे मुकुंदा तेथून निघाला. त्यानंतर गुड्डूने मोबाइलवर संपर्क साधून मुकुंदाला शिवीगाळ केली. काही वेळाने गुड्डू व त्याचा अल्पवयीन साथीदार मुकुंदाच्या घरी गेले. त्याला घराबाहेर ओढून मारहाण करायला लागले. आवाजाने नेमलाल बाहेर आले. त्यांनी वाद सोडविला. गुड्डू व त्याच्या साथीदाराने नेमलाल यांना मारहाण करून जमिनीवर पाडले. दोघांनी नेमलाल यांना लाथाबुक्क्यांनी मारहाण केली. नेमलाल बेशुद्ध झाले. गुड्डू व त्याचा साथीदार पसार झाले. मुकुंदा यांनी शेजाऱ्यांच्या मदतीने नेमलाल यांना हॉस्पिटलमध्ये दाखल केले. डॉक्टरांनी तपासून नेमलाल यांना मृत घोषित केले. पारडी पोलिसांनी खुनाचा गुन्हा दाखल करून गुड्डूला अटक केली.
