Big News: मुंबई महानगरपालिकेचा तब्बल ₹ 74,427.41 हजार कोटींचा अर्थसंकल्प!
अर्थसंकल्पामध्ये मुंबईकरांवर करवाढ, दरवाढ आणि शुल्क वाढ नाही
मुंबई : देशातील सर्वात मोठी आणि श्रीमंत महानगरपालिका म्हणून ख्याती असणाऱ्या मुंबई महानगर पालिकेचा अर्थसंकल्प मंगळवारी ,4 फेब्रुवारी रोजी सादर करण्यात आला. या अर्थसंकल्पात यंदा तब्बल 14.19 टक्के वाढ झाली आहे. यंदा मुंबई महापालिकेचा सन 2025 – 26 चा अर्थसंकल्प तब्बल ₹ 74,427.41 हजार कोटी रुपयांचा आहे
मुंबई महानगर पालिकेचे अतिरिक्त आयुक्त अभिजित बांगर यांनी आयुक्त भूषण गगराणी यांना हा अर्थसंकल्प सादर केला. 60.65 कोटी रुपये शिलकीच्या या अर्थसंकल्पात महापालिका आयुक्त तथा प्रशासक डॉ भूषण गगराणी यांनी मुंबईकरांवर कोणत्याही प्रकारची करवाढ, दरवाढ आणि शुल्क वाढ लादलेली नाही. हाती घेण्यात आलेल्या विकास प्रकल्प कामांना गती देतानाच आर्थिक संकटातही जनतेवर कोणताही बोजा न लादता महसूल वाढीवर अधिक भर देण्यात आला आहे.यावेळी महापालिका अतिरिक्त डॉ विपीन शर्मा, महापलिका सचिव रसिका देसाई , उपायुक्त (वित्त) प्रशांत गायकवाड, उपप्रमुख लेखापाल गोसावी उपप्रमुख लेखापाल (अर्थसंकल्प)अरुण जाधव आदी उपस्थित होते.
चालू अर्थसंकल्प हा ५९ हजार ९०० कोटींचा मांडण्यात आला होता तो सुधारीत करून त्याचे आकारमान ६५, १८० कोटींवर नेण्यात आले आणि आगामी अर्थसंकल्पाचे आकारमान या सुधारीत अर्थसंकल्पाच्या तुलनेत १४.१९ टक्क्यांनी वाढवून ७४,४२७.४१ कोटी रुपयांवर नेवून ठेवले आहे. यामध्ये भांडवली खर्चाकरता ४३ १६२ कोटी रुपयांची तरतूद करण्यात आली आहे. तर महसुली करता ३१,२०४ कोटी रुपये खर्च होणार आहे. चालू आर्थिक वर्षांत १२, ११९ कोटी रुपये इतका निधी तात्पुरत्या अंतर्गत हस्तांतरणद्वारे वळता केला होता, परंतु आगामी अर्थसंकल्पात ही रक्कम १६,६९९ कोटी रुपये एवढी दर्शवली आहे. त्यामुळे अंतर्गत कर्जावरच अर्थसंकल्पाचा आकडा वाढवण्यात आल्याचे दिसून येत आहे.
महापालिका आयुक्तांनी या अर्थसंकल्पात महसूल वाढीवर भर देतानाच विकास नियोजन खात्याकडून ९७०० कोटी रुपयांचा महसूल प्रस्ताविला आहे. मालमत्ता कराचा महसूल ५२०० कोटी रुपयांवर प्रस्तावित केले आहे. गुंतवणुकीवर व्याजातून २२८३ कोटी रुपये, जल आणि मलनि:सारण करातून २३६३ कोटी रुपयांचे महसूल अपेक्षित मानला आहे. याशिवाय अग्निशमन दलाकडून शुल्कापोटी ७५९ कोटी रुपये, परवाना विभागाकडून ३६२ कोटी रुपये, शासनाकडील थकबाकीची रक्क्म ६५८१ कोटी रुपये अशाप्रकारे महसूल वाढीचे स्त्रोत दर्शवले आहेत.
हेही वाचा: सरकारी कार्यालयांमध्ये आता मराठी भाषा अनिवार्य; राज्य सरकारने घेतला मोठा निर्णय
मुंबई महापालिका अर्थसंकल्पातील महत्वाचे…
- हिंदुह्दयसम्राट बाळासाहेब ठाकरे शहरी हरितीकरण प्रकल्प
- आनंदवन हरित पट्टा
- गोरेगाव मुलुंड लिंक रोडवर उभारणार वाघाचे शिल्प
- लंडन आयच्या धर्तीवर उभारणार मुंबई आय
- विकासकामांसाठी तरतूद
बेस्ट अनुदान : १००० कोटी रुपये
शिक्षण विभाग : ३२४१ कोटी रुपये
घनकचरा व्यवस्थापन विभाग : ५५४८ कोटी रुपये
पर्जन्य जलवाहिनी विभाग : ३०३९ कोटी रुपये
कोस्टल रोड प्रकल्प : १५४५ कोटी रुपये
रस्ते आणि वाहतूक विभाग : ६५१९ कोटी रुपये
पूल विभाग : ८३६९ कोटी रुपये
आरोग्य विभाग : १९५८ कोटी रुपये
प्रमुख रुग्णालये : २४५५ कोटी रुपये
वैद्यकीय महाविद्यालये : ५७९ कोटी रुपये
विशेष रुग्णालये : ३०६ कोटी रुपये
जल अभियंता विभाग : ४३७२ कोटी रुपये
पाणी पुरवठा प्रकल्प खाते : ४०५६ कोटी रुपये
मलनि:सारण प्रचालन विभाग : १९७२ कोटी रुपये
मलनि:सारण प्रकल्प खाते : ४३९ कोटी रुपये
मलनि:सारण प्रकल्प कामे : ६५३२ कोटी रुपये
नगर अभियंता विभाग : ३३९५ कोटी रुपये
विकास नियोजन विभाग : १८३१ कोटी रुपये
उद्यान आणि प्राणिसंग्रहालय : ७३१ कोटी रुपये
कोळीवाड्यांच्या विकासासाठी २५ कोटी रुपयांची ठोक तरतूद
स्वच्छ, शाश्वत आणि सक्षम मुंबईसाठी कटिबध्द या मंत्राचा नारा देत हा अर्थसंकल्प सादर केला आहे .वित्तीय शिस्त आणि शाश्वतता, अर्थसंकल्पीय तरतुदींच्या अनुषंगाने वित्तीय शिस्त, पायाभूत सेवा सुविधांचे सक्षमीकरण, गुणवत्तापूर्ण आरोग्य व शिक्षण व्यवस्था, स्वच्छ आणि शाश्वत पर्यावरण, सामाजिक उपक्रम, प्रशासकीय व कार्यालयीन कार्यक्षमता आदींवर भर देत अर्थसंकल्पाचा ताळमेळ साधण्याचा प्रयत्न केला आहे.
– भूषण गगराणी, आयुक्त, मुंबई महानगर पालिका.
महाईन्यूज-X वर फॉलो करा : महाईन्यूजला instagram वर फॉलो करा
