मुंबई | मनसे अध्यक्ष राज ठाकरे यांनी ठाण्यात घेतलेल्या उत्तरसभेत पुन्हा एकदा राष्ट्रवादी काँग्रेस आणि पवार कुटुंबीयांवर हल्ला चढवला आहे. तसंच, संजय राऊत (Sanjay Raut) यांच्यावरही खोचक शब्दांत निशाणा साधला. राज ठाकरे यांच्या सभेनंतर राजकीय स्तरावर प्रतिक्रिया येत असताना आता संजय राऊत यांनीही राज यांना प्रत्युत्तर दिलं आहे.
राज ठाकरेंनी काल झालेल्या सभेत बोलताना पवार कुटुंबीयांसोबतच संजय राऊत यांनाही टोला हाणला आहे. मी त्यांच्या वाढदिवसाच्या भाषणात बोललो होतो की शरद पवार खूश झाले म्हणजे भीती वाटायला लागते. आज शरद पवार संजय राऊतांवर खूश आहेत. कधी टांगलेला दिसेल कळणारही नाही. यात अनेक काँग्रेसवाले गेलेत. मग उशिरा समजतं की तेव्हा ते बोलले होते, ते आज लागलंय, अशी टीका राज ठाकरेंनी केली होती. तसंच, संजय राऊत यांची मालमत्ता जप्त करताच त्यांची भाषा बदलली असून, पत्रकार परिषदेत ते शिव्या देत होते. ते राष्ट्रवादीचे की शिवसेनेचे हेच कळत नाही,’अशा शब्दांत राज यांनी त्यांना टोला लगावला होता. राज ठाकरेंच्या या टीकेवर शिवसेना खासदार संजय राऊत यांनीही मिश्किल टिप्पणी केली आहे.
राज ठाकरेंच्या भाषणानंतर संजय राऊतांनी ट्विट करत प्रत्युत्तर दिलं आहे. दिवा विझताना मोठा होतो हे आज पुन्हा दिसले. जय महाराष्ट्र, अशी मिश्किल टिप्पणी संजय राऊत यांनी केली आहे.
दरम्यान, जयंत पाटलांच्या टीकेला उत्तर देताना मनसे हा विझलेला पक्ष नसून, दुसऱ्यांना विझवणारा पक्ष आहे’, असा टोलाही राज यांनी लगावला. ‘राष्ट्रवादी ही निवडून येणाऱ्या उमेदवारांची मोळी असून, शरद पवार हे या मोळीची दोरी आहेत. छगन भुजबळ यांची चौकशी मोदींवर टीका केल्याबद्दल नव्हे, तर संस्थेतील गैरव्यवहारामुळे करण्यात आली’, असे उत्तर राज ठाकरे यांनी दिले.
