पुणे | पुणे शहरांमध्ये दिवसेंदिवस चोरीच्या घटना वाढत आहेत. अशीच एक धक्कादायक घटना महाराष्ट्र टाइम्स ऑनलाईनच्या हाती लागली आहे. चोरट्यांना पुणे पोलिसांचा धाकच राहिलेला नाही. हातात कोयते घेऊन रस्त्यावर नागरिकांमध्ये दहशत पसरवणारी गँग पुण्यात सक्रिय झाली आहेत. शहरातील लोहगावात संजय महाले नावाच्या सराफ व्यावसायिकाला कोयत्याचा धाक दाखवून तब्बल 73 हजारांचे दागिने चोरट्यांनी लंपास केले आहेत. ही घटना लोहगाव परिसरात घडली आहे. त्यानंतर व्यावसायिकाने तात्काळ विमानतळ पोलीस स्टेशनमध्ये फिर्याद दाखल केली आहे.
आझाद चौकात महाले ज्वेलर्स सराफ मध्ये दोन चोरटे दुकानात शिरले त्यांनी दागिने खरेदी करण्याचा बहाणा केला. एकाने महाले यांना कोयत्याचा धाक दाखवला तर दुसऱ्या चोरट्याने त्यांना पकडून ठेवलं. जीवे मारण्याची धमकी देऊन 73 हजाराचे दोन सोनसाखळ्या चोरट्यांनी लांबवल्या. या संपूर्ण प्रकरणाबाबत पोलीस तपास करत आहेत. दरम्यान, पुणे शहरामध्ये कोयता गॅंग मोठ्या प्रमाणावर सक्रिय आहे. मात्र, त्यावर पोलिसांचा वचक राहिलेला अजिबात दिसत नाही.
असा घडला सर्व प्रकार
संध्याकाळी साडेपाच वाजता दोघे जण दुकानात आले त्यांनी मला गळ्यातील चैन दाखवण्याचा बहाणा केला. बऱ्याच वेळ त्यांनी गळ्यात चैन घालून पहिल्या त्यानंतर त्या चैन काढून घेतल्या आणि मागे होऊन चैन डिस्प्लेला लावत असताना त्यातील एकाने मागून माझा गळा दाबला आणि एकाने कोयत्याचा धाक दाखवून काउंटरवरून उडी मारून माझा साधारण अडीच तोळ्यांचा माल घेऊन ते फरार झाले. त्यांच्या हातात कोयता असल्याने ते पळून जाण्यात यशस्वी झाले, असं संजय महाले यांनी सांगितलं.
