हिंगोली| किरकोळ वादातून पतीने पत्नीच्या गळ्यावर चाकूने वार करत तिची निर्घृण हत्या केल्याची घटना हिंगोलीत घडली आहे. वसमत तालुक्यातील सारोळा शिवारमध्ये ही घटना घडलीये. अलका विश्वनाथ पोटे (वय १९) असं हत्या करण्यात आलेल्या पत्नीचं नाव आहे.
वसमत तालुक्यातील सारोळा शिवारामध्ये हळद काढणी च्या कामासाठी आलेल्या पती-पत्नीमध्ये किरकोळ वाद होऊन पतीने पत्नीच्या गळ्यावर चाकूने वार करून खून केल्याची घटना बुधवारी काल दुपारी साडेचार वाजण्याच्या सुमारास घडली आहे. अलका विश्वनाथ पोटे ( १९ रा. सोनवाडी) असे मयत महिलेचे नाव असल्याचे पोलिसांनी सांगितले.
पोलिसांनी दिलेल्या माहितीनुसार वसमत तालुक्यातील कोठारी येथील अलका यांचा विवाह चार महिन्यापूर्वी औंढा तालुक्यातील सोनवाडी येथील विश्वनाथ पोटे याच्यासोबत झाला होता. त्यानंतर काही दिवसापूर्वी दोघेजण इतर मजुरांसोबत वसमत तालुक्यातील सारोळा शिवारमध्ये हळद काढणीच्या कामाला आले होते.
दरम्यान, काल दुपारी साडेचार वाजण्याच्या सुमारास अलका आणि विश्वनाथ यांच्यामध्ये किरकोळ कुरबुर झाली. त्यानंतर विश्वनाथ याने पत्नी अलका पोटे हिच्या गळ्यावर चाकूने सपासप वार केले. अचानक झालेल्या या हल्ल्यामुळे अलका पोटे यांनी जीव वाचवण्यासाठी काही करण्यापूर्वीच ती जागेवरच रक्ताच्या थारोळ्यात पडली. पत्नी अलकाचा मृत्यू झाल्याचे लक्षात आल्यानंतर विश्वनाथ पोटे याने चाकू घेऊन घटनास्थळावरून पळ काढला.
या प्रकाराची माहिती इतर मजुरांनी वसमत ग्रामीण पोलीस ठाण्याला दिली. पोलीस अधीक्षक राकेश कलासागर, सहाय्यक पोलीस अधीक्षक यतीश देशमुख यांच्या मार्गदर्शनाखाली उपाधिक्षक किशोर कांबळे वसमत ग्रामीण पोलीस ठाण्याचे सहाय्यक पोलीस निरीक्षक विलास चवळी, उपनिरीक्षक ज्ञानेश्वर शिंदे यांच्या पथकाने तातडीने घटनास्थळी भेट दिली.
पोलिसांनी मृत अलकाचा मृतदेह उत्तरीय तपासणीसाठी वसमतच्या उपजिल्हा रुग्णालयात रात्री दाखल केला. या प्रकरणात पतीविरोधात गुन्हा दाखल झाला असून फरार झालेल्या विश्वनाथ पोटेच्या तपासासाठी पोलिसांनी पथकेही रवाना करण्यात आली आहेत.
