breaking-newsताज्या घडामोडीमहाराष्ट्रमुंबईराजकारण

‘तो प्रकार अनैसर्गिक लैंगिक कृत्याच्या गुन्ह्याचा नाही’, न्यायालयाचे निरीक्षण

मुंबई : ओठांचे चुंबन घेणे व गुप्तांगाला स्पर्श करणे हे भारतीय दंड विधानाच्या कलम ३७७ अन्वये असलेल्या अनैसर्गिक लैंगिक कृत्याच्या गुन्ह्याच्या प्रकारात मोडत नाही, असे निरीक्षण नोंदवत मुंबई उच्च न्यायालयाने ‘पोक्सो’ प्रकरणातील आरोपीला नुकताच जामीन मंजूर केला. १४ वर्षांच्या मुलाच्या वडिलांनी आरोपीविरोधात एफआयआर नोंदवल्यानंतर पोलिसांनी त्याला अटक केली. मागील वर्षभरापासून तो अटकेत आहे. न्या. अनुजा प्रभुदेसाई यांनी आरोपीच्या जामीन अर्जावरील सुनावणीअंती त्याला ३० हजार रुपयांच्या वैयक्तिक हमीवर जामीन मंजूर केला.

एफआयआरनुसार, एके दिवशी मुलाच्या वडिलांना घरातील कपाटात पैसे कमी असल्याचे आढळले. त्यामुळे त्यांनी मुलाकडे चौकशी केली असता, आरोपीच्या दुकानात ‘ओला पार्टी’ नावाच्या ऑनलाइन गेमचे रिचार्ज करण्यासाठी खर्च केल्याचे त्याने सांगितले. तसेच एके दिवशी रिचार्जसाठी गेलो असताना आरोपीने माझ्या ओठांचे चुंबन घेतले आणि गुप्तांगाला स्पर्श केला, असेही मुलाने वडिलांना सांगितले. त्यामुळे वडिलांनी पोलिसांत तक्रार नोंदवल्यानंतर आरोपीविरोधात पोक्सो कायद्यातील विविध कलमांबरोबरच भारतीय दंड विधानाच्या कलम ३७७ (अनैसर्गिक लैंगिक कृत्य) अन्वये एफआयआर नोंदवण्यात आला.

‘एफआयआर तसेच पीडित मुलाच्या जबाबानुसार आरोपीने त्याच्या ओठांचे चुंबन घेतले व त्याच्या गुप्तांगाला स्पर्श केला. प्रथमदर्शनी हा प्रकार कलम ३७७ अन्वये अनैसर्गिक लैंगिक कृत्याच्या प्रकारात मोडत नाही. आरोपीविरोधातील इतर कलमांन्वये कमाल पाच वर्षांच्या शिक्षेची तरतूद आहे. आरोपी वर्षभरापासून कोठडीत आहे आणि खटल्याची सुनावणी लवकर सुरू होण्याची चिन्हे नाहीत. त्यामुळे तो जामीन मिळण्यासाठी पात्र आहे’, असे निरीक्षण न्यायमूर्तींनी आपल्या आदेशात नोंदवले.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button