गुंतवणूकदारांची ‘सोन्याची’ फसवणूक
मुंबई | प्रतिनिधी
वेगवेगळ्या नावाने कंपन्या सुरू करून त्यामध्ये गुंतवणूक केल्यास ठराविक कालावधीनंतर जास्त दराने व्याज किंवा सोन्याच्या रूपात परतावा दिला जाईल, असे प्रलोभन दाखवून शेकडो लोकांची फसवणूक करण्यात आल्याचा प्रकार समोर आला आहे. आतपर्यंत जवळपास ५० पेक्षा अधिक गुंतवणूकदारांना फसविण्यात आल्याचे समोर आले असून याप्रकरणी एका शिक्षिकेच्या तक्रारीवरून मुलुंड पोलिस ठाण्यात गुन्हा दाखल करण्यात आला आहे.
मुलुंड पश्चिमेकडे मेसर्स क्रोम बिझनेस आणि ट्रेड इंडिया प्रायव्हेट लिमिटेड या कंपनीचे कार्यालय आहे. या कंपनीत काम करणाऱ्या एका व्यक्तीने मालाड येथील शिक्षिकेला कंपनीतील वेगवेगळ्या गुंतवणुकीच्या योजनांबाबत सांगितले. योजना चांगली वाटल्याने या शिक्षिकेने स्वतः पैसे गुंतविले आणि ठराविक कालावधीनंतर परतावा मिळाल्याने तिचा यावर विश्वास बसला. कंपनीमध्ये एजंट झाल्यास स्वतःची गुंतवणूक आणि त्याच बरोबर इतरांच्या गुंतवणुकीवर कमिशन दिले जाईल, असे सांगण्यात आले. यासाठी शिक्षिकेने तयारी दाखवली आणि परिसरातील, नात्यातील, मित्रमंडळींना या योजनेबाबत सांगितले. शिक्षिकेने माहिती दिल्यामुळे जवळपास ५० गुंतवणूकदारांनी या कंपनीत पैसे गुंतविले. अनेकांना सुरुवातीला परतावा मिळत गेला. मात्र करोनाचा प्रादुर्भाव सुरु झाल्यामुळे गुंतवणुकीचा कालावधी संपलेल्या परतावा मिळणे बंद झाले. गुंतवणूकदारांनी एजंट असल्यामुळे शिक्षिकेकडे पैसासाठी तगादा लावला. वारंवार सांगूनही पैसे मिळत नसल्याने शिक्षिकेने पोलिसांत धाव घेतली.