ताज्या घडामोडीपुणे

कात्रज येथील गंधर्व लॉन्सजवळील सुधामाता मंदिर परिसरात; सिलिंडरच्या स्फोटांनी कात्रज हादरले

पुणे | प्रतिनिधी 

कात्रज येथील गंधर्व लॉन्सजवळील सुधामाता मंदिर परिसरात मंगळवारी सायंकाळी एका पाठोपाठ २२ सिलिंडरचे स्फोट झाले. सिलिंडरमध्ये अवैधपणे गॅस भरला जात असताना हे स्फोट झाले. या स्फोटांच्या आवाजाने कात्रज परिसर हादरून गेला. स्फोट झालेल्या ठिकाणी काही प्रमाणात आगीच्या ज्वाळा उसळल्या होत्या. त्यामुळे स्थानिक नागरिकांमध्ये घबराट पसरली. या स्फोटात एक छोटे मालवाहू वाहन, एका कारचे नुकसान झाले. स्फोटात जीवितहानी झाली नाही. मात्र, एक जण किरकोळ जखमी झाला.

मंगळवारी सायंकाळी पाच वाजण्याच्या सुमारास ही घटना घडली. घटनेची माहिती मिळताच कात्रजसह कोंढवा बुद्रुक, स्वारगेट आणि वारजे अग्निशामक दलाच्या पथकांनी तातडीने घटनास्थळी धाव घेतली. सिलिंडरचा स्फोट होऊन आगीचा उडालेला भडका दूर अंतरावरूनही दिसत होता. अग्निशमन दलाच्या जवानांनी अथक प्रयत्नानंतर एकूण आठ गाड्यांद्वारे आग आटोक्यात आणली. हा परिसर तीव्र डोंगर उताराचा असल्याने गाड्या घटनास्थळी जाऊ शकल्या नाहीत. त्यामुळे अग्निशमन दलास २०० मीटर अंतरावरून पाणी आणून मदतकार्य करावे लागले. स्फोट झाल्यानंतर स्वारगेट विभागाच्या सहायक आयुक्त सुषमा चव्हाण, भारती विद्यापीठ पोलिस ठाण्याचे वरिष्ठ निरीक्षक जगन्नाथ कळसकर यांच्यासह पोलिस कर्मचारीही घटनास्थळी हजर झाले.

गळतीमुळे स्फोट?

सुंधामाता मंदिर परिसरातील पत्र्याच्या शेडमध्ये मोठ्या सिलिंडरमधून छोट्या पाच किलोच्या सिलिंडरमध्ये गॅस भरण्याचे काम अवैधपणे केले जात होते. या ठिकाणी सिलिंडरमध्ये गॅस भरताना गळतीमुळे स्फोट झाला असण्याची शक्यता व्यक्त केली जात आहे. स्फोटानंतर पोलिसांनी येथून १६ रिकामे सिलिंडर आणि आठ भरलेले मोठे सिलिंडर ताब्यात घेतले, अशी माहिती वरिष्ठ निरीक्षक जगन्नाथ कळसकर यांनी दिली. दरम्यान या प्रकरणी रात्री उशिरापर्यंत भारती विद्यापीठ पोलिस ठाण्यात गुन्हा दाखल करण्याचे काम सुरू होते. एका पाठोपाठ झालेले स्फोट एवढे भीषण होते, की तेथून काही अंतरावर असलेल्या एका घरावरील पाण्याची टाकी सिलिंडरचा तुकडा लागल्याने फुटली. स्फोटांच्या आवाजामुळे एका घराच्या खिडकीच्या काचाही फुटल्या.

मुलांमध्ये घबराट

‘सिलिंडरचे स्फोट होत असताना आम्ही घरात होतो. आवाज एवढे मोठे होते, की आमच्या घराच्या काचा फुटल्या. काय सुरू आहे, काहीच कळाले नाही. त्यामुळे आमची मुले खूप घाबरली होती,’ अशी प्रतिक्रिया स्थानिक रहिवासी वर्षा पवार यांनी व्यक्त केली. दरम्यान, या ठिकाणी मोठ्या सिलिंडरमधून छोट्या सिलिंडरमध्ये गॅस भरून विक्रीसाठी पाठविले जात असल्याची माहिती स्थानिक पोलिसांना देण्यात आली होती, मात्र आजतागायत कारवाई करण्यात आलेली नाही, असे काही महिलांनी सांगितले.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button