राज्यातील वीज ग्राहकांसाठी महत्त्वाची बातमी; ‘अशी’ मिळवा वीजदरात पाच टक्के सवलत
पुणे : वीजबिलासोबत आलेले अतिरिक्त सुरक्षा ठेवींचे बिल एकरकमी अथवा सहा मासिक हप्त्यात भरणे शक्य नसल्यास वीजग्राहकांना प्रीपेड मीटरच्या मागणीचा पर्याय उपलब्ध आहे. प्रीपेड मीटरवर कोणतीही सुरक्षा ठेव भरावी लागत नाही, तसेच वीजदरात पाच टक्के सवलतही मिळते, असे वीज तज्ज्ञांनी स्पष्ट केले. सध्या राज्यातील सर्व वीजग्राहकांना अतिरिक्त सुरक्षा ठेव मागणीची बिले देण्यात आली आहेत. त्यावरून ग्राहकांमध्ये संभ्रम निर्माण झाला आहे. वास्तविक राज्य वीज नियामक आयोगाच्या वीजपुरवठा संहितेनुसारच वीजग्राहकांकडून अतिरिक्त सुरक्षा ठेव आकारली जाते. पूर्वी सुरक्षा ठेव रक्कम एका महिन्याच्या बिलाइतकी होती. आता ती दुप्पट म्हणजे दोन महिन्यांच्या बिलांइतकी करण्यात आली आहे.
वीज नियामक आयोगाने ही रक्कम भरण्यासाठी ग्राहकांना सहा मासिक हप्त्यांची सवलतही दिली आहे. याबाबत महाराष्ट्र वीज ग्राहक संघटनेने पाठपुरावा केल्यानंतर महावितरणने ग्राहकांना सुरक्षा ठेव सहा हप्त्यांत भरता येईल, असे ‘एसएमएस’ पाठविण्यास सुरवात केली आहे. मात्र, अनेक ग्राहकांना हे ‘एसएमएस’ मिळालेले नाहीत. त्यामुळे अतिरिक्त सुरक्षा ठेवींचे बिल कसे भरायचे याबाबत ग्राहक गोंधळात आहेत.
या पार्श्वभूमीवर ज्येष्ठ वीज तज्ज्ञ आणि महाराष्ट्र वीजग्राहक संघटनेचे अध्यक्ष प्रताप होगाडे यांनी माहिती दिली. ‘वीजग्राहकांना अतिरिक्त सुरक्षा ठेवीचे बिल एकरकमी किंवा सहा समान मासिक हप्त्यांत भरता येईल. मात्र, ज्या ग्राहकांची अतिरिक्त सुरक्षा ठेवीची रक्कम मोठी आहे किंवा करोनानंतर उद्भवलेल्या आर्थिक अडचणींमुळे ही रक्कम सहा मासिक हप्त्यांमध्येही भरणे शक्य नाही, अशा ग्राहकांसाठी प्रीपेड मीटरचा पर्याय उपलब्ध आहे. प्रीपेड मीटरसाठी सुरक्षा ठेव आवश्यक नाही. प्रीपेड मीटरचा पर्याय ग्राहकांनी स्वीकारल्यास सध्याची जमा सुरक्षा अनामत रक्कम ग्राहकांच्या प्रीपेड खात्यात वर्ग केली जाते. त्यातून त्याच्या पुढील वीज वापराची रक्कम वजा केली जाते. प्रीपेडड मीटर ग्राहकांना अतिरिक्त पाच टक्के वीजदर सवलत उपलब्ध आहे’, असे प्रताप हेगडे यांनी सांगितले.
