अनैतिक संबंधातून काढला पतीचा काटा, पत्नी, प्रियकरासह तिघांना अटक
अहमदनगर: अनैतिक संबंधातून पत्नीने प्रियकरासोबत मिळून पतीची निर्घृण हत्या केल्याची घटना घडलीये. जामखेड तालुक्यातील खर्डा येथे ही घटना घडलीये. विशाल ईश्वर सुर्वे असं हत्या करण्यात आलेल्या पतीचं नाव आहे. या प्रकरणी जामखेड पोलीस ठाण्यात गुन्हा दाखल झाला असून पत्नी, तिचा प्रियकरासह तिघांना अटक करण्यात आली आहे.
मृत विशाल ईश्वर सुर्वेच्या पत्नी पुजा सुर्वेचं कृष्णा नावाच्या व्यक्तीशी अनैतिक संबंध होते. अनैतिक संबंधात काटा ठरत असलेल्या पतीला संपवायचा निर्णय तिने केला. पुजाने पती विशालचे लोकेशन कृष्णाला दिले. त्याने मित्र कन्हेरकर याला सोबत घेऊन रस्त्यावर मोटारसायकल आडवी लावली आणि गाडी बंद पडल्याचे नाटक केले. विशाल त्या रस्त्यावरून जात असताना त्याला रस्त्यावर गाडी आडवी दिसल्याने गाडी थांबवली. विशालने त्यांना विचारले की गाडी का आडवी लावली. तेव्हा गाडी बंद पडली आहे, स्क्रु ड्रायव्हर हवा आहे, असं सांगितलं. त्यानंतर पाना हवा आहे, असंही सांगितलं.
विशाल पाना काढत आसताना मंदिराच्या पाठीमागे लपलेल्या एकाने येऊन विशालच्या डोक्यात लोखंडी रॉड घातला. तो खाली पडल्यावर त्यांच्यावर परत रॉडने वार केले. यात तो रक्ताच्या थारोळ्यात पडला आणि जागीच त्याचा मृत्यू झाला. याप्रकरणी मुख्य आरोपी कृष्णा संजय सुर्वे, पत्नी पुजा आणि श्रीधर राम कन्हेरकर या तीन आरोपींना पोलिसांनी अटक केली आहे. पुढील तपास सुरू आहे.