पुण्यात आजपासून हेल्मेटसक्ती?; जिल्हाधिकाऱ्यांनी केलं स्पष्ट
पुणेः पुण्यात आजपासून हेल्मेटसक्तीचा निर्णय घेण्यात आला होता. पुण्याचे जिल्हाधिकारी राजेश देशमुख यांनी तसे आदेशही जारी केले होते. मात्र, आता पुण्यात कोणत्याही प्रकारची हेल्मेटसक्ती नसेल असं स्पष्ट करण्यात आलं आहे. पुण्यात प्रसारमाध्यमाशी बोलताना त्यांनी ही माहिती दिली आहे.
शासकीय कर्मचारी, शाळा आणि महाविद्यालयांतील दुचाकीधारक अधिकारी, कर्मचारी यांना हेल्मेट बंधनकारक करण्यात आले असल्याचे गुरुवारी जारी करण्यात आले होते. तसंच, हेल्मेटसक्तीचं उल्लंघन केल्यास कठोर कारवाई करण्यात येईल, असंही या पत्रकात नमूद करण्यात आलं होतं. मात्र, आज पुण्याचे जिल्हाधिकारी राजेश देशमुख यांनी पत्रकार परिषद घेत पुण्यात कोणत्याही प्रकारची हेल्मेटसक्ती नसेल असं स्पष्ट केलं आहे.
पुण्यात कोणत्याही प्रकारची हेल्मेटसक्ती नसेल. याउलट नागरिकांचे हेल्मेटबाबत प्रबोधन केलं जाईल. व पहिल्या टप्प्यात शासकीय कर्मचाऱ्यांना कामावर येताना हेल्मेट वापरावे यासाठी सुचना करण्यात आल्या आहेत, असंही देशमुखांनी म्हटलं आहे.
दरम्यान, रस्ते अपघातात मृत्यू होणाऱ्यांमध्ये दुचाकीस्वारांचे प्रमाण अधिक आहे. त्यातही हेल्मेटच्या अभावी डोक्याला गंभीर दुखापत होऊन दगावणाऱ्यांची संख्या अधिक आहे. सर्वोच्च न्यायालयाने स्थापन केलेल्या रस्ता सुरक्षा समितीनेही याबाबत चिंता व्यक्त केली आहे. त्यामुळे दुचाकीस्वारांनी हेल्मेटचा अधिकाधिक वापर करावा यासाठी दुचाकीवरून सरकारी कार्यालयात येणारे कर्मचारी आणि नागरिक यांना आता हेल्मेट परिधान करणे बंधनकारक करण्याचा निर्णय परिवहन आयुक्तालयाने घेतला. त्यानुसार जिल्हाधिकारी डॉ. राजेश देशमुख यांनी पुण्यातील सर्व शासकीय आणि निमशासकीय कार्यालयात परिवहन आयुक्तालयाच्या निर्णयाची अंमलबजावणी करण्याचा निर्णय घेतला.