न्यूयॉर्कमध्ये गणेश मंदिर मार्ग
न्यूयॉर्क |न्यूयॉर्कमधील सुप्रसिद्ध गणेश मंदिराबाहेरील रस्त्याचे ‘गणेश मंदिर मार्ग’ असे नामकरण करण्यात आले आहे. ‘द हिंदू टेम्पल सोसायटी ऑफ नॉर्थ अमेरिका श्री महा वल्लभ गणपती देवस्थानम्’ म्हणजेच ‘गणेश मंदिर’ या नावाने ओळखले जाणारे हे मंदिर उत्तर अमेरिकेतील पहिले आणि सर्वात जुने मंदिर म्हणून ओळखले जाते. सन १९७७मध्ये या मंदिराची स्थापना करण्यात आली होती. हे मंदिर क्वीन्स कौंटी येथील फ्लशिंग येथे आहे. या मंदिराबाहेरील रस्ता बाऊन स्ट्रीट म्हणून ओळखला जातो. धार्मिक स्वातंत्र्यासाठी लढणारे आणि
दासमुक्ती चळवळीचे प्रवर्तक अशी जॉन बाऊन यांची ओळख आहे. आता हा रस्ता ‘बाऊन स्ट्रीट’सह ‘गणेश मंदिर मार्ग’ या नावानेही ओळखला जाईल. एका विशेष कार्यक्रमात या मार्गाच्या नामफलकाचे अनावरण करण्यात आले. या कार्यक्रमाला न्यूयॉर्कमधील भारताचे कौन्सुल जनरल रणधीर जैस्वाल, न्यूयॉर्क शहराचे महापौर एरिक अॅडम्स, न्यूयॉर्कच्या व्यापार आणि गुंतवणूक विभागाचे उपायुक्त दिलीप चौहान आणि भारतीय-अमेरिकी समाजाचे नागरिक उपस्थित होते.