नाशिक:प्रतिनिधी
इंधनाचे दर सातत्याने वाढत असल्याने वाहनधारकांचा खिसा रिकामा होतो आहे. परंतु, इंधनावर धावणाऱ्या वाहनांना इलेक्ट्रिकल व्हेईकल्सचा पर्याय उपलब्ध झाला असून, नाशिकमध्ये त्यास चांगला प्रतिसाद मिळतो आहे. जिल्ह्यात सुमारे तीन हजार इलेक्ट्रिकल्स वाहने सध्या रस्त्यावर धावत आहेत.
गेल्या काही दिवसांपासून सातत्याने इंधनाचे दर वाढत आहेत. काही महिन्यांपूर्वी प्रति लिटर १०० रुपयांचा टप्पा पेट्रोलने पार केला. युक्रेन आणि रशियामधील युद्धाच्या झळा आता भारतातही बसत असून, इंधनाचे दर रोजच वाढत आहेत. त्यामुळे सर्वसामान्य नागरिकांचे आर्थिक बजेट कोलमडू लागले आहे. पेट्रोलियम पदार्थांचा मर्यादित साठा, ट्रोल डिझेलवरील वाहनांमुळे मानवी आरोग्य, वातावरणावर होणारे विपरीत परिणाम यामुळे वाहनांसाठी पर्यायी इंधनाचा वापर करणे अनिवार्य होऊ लागले आहे. यातूनच इलेक्ट्रिक वाहनांचा पर्याय पुढे आला असून, नाशिकमध्ये देखील ही वाहने आता नजरेस पडू लागली आहेत. ही वाहने खरेदी करण्याकडे नागरिकांचा कल वाढत असल्याची माहिती प्रादेशिक परिवहन कार्यालयाने दिली. जिल्ह्यात सद्यस्थितीत सुमारे तीन हजार इलेक्ट्रिक वाहने रस्त्यावर धावत आहेत. त्यामध्ये मोटरसायकल्सचे प्रमाण अधिक आहे. त्या खालोखाल मोपेडला ग्राहकांची पसंती मिळत असून, इलेक्ट्रिक कार खरेदी करण्याकडेही ग्राहकांचा कल वाढतो आहे.
प्रतितास ११५ किलोमीटर असा उच्चतम वेग, १५० किलोमीटरची चार्जिंग रेंज, डिजिटल चावी, व्हाईस कंट्रोल, रिव्हर्स असिस्ट, वाहन सुरक्षिततेचे प्रगत तंत्रज्ञान यामुळे ग्राहक ही वाहने खरेदी करण्याकडे आकर्षित होतात. परंतु, इलेक्ट्रीक वाहनांना चार्जिंगला अधिक वेळ लागतो. याशिवाय पेट्रोल-डिझेल वाहनांच्या तुलनेत या वाहनांची किंमतही अधिक असल्याने इच्छा असूनही नागरिकांना इलेक्ट्रिक वाहने खरेदी करण्यास मर्यादा येत आहेत. येत्या काळात सार्वजनिक ठिकाणी चार्जिंगची सुविधा मोठ्या प्रमाणावर उपलब्ध झाल्यास इलेक्ट्रिक वाहन खरेदीला प्रतिसाद अधिक वाढू शकेल, असा विश्वास व्यक्त होऊ लागला आहे.
जिल्ह्यातील इलेक्ट्रिकल्स वाहनांची स्थिती
वाहन प्रकार संख्या
मोटरसायकल १,५९३
मोपेड १,०००
कार २९१
मोटरसायकल विथ साईड कार ०१
