केजरीवाल फेक व्हिडीओप्रकरणी संबित पात्रांवर गुन्हा दाखल करा; न्यायालयाचा आदेश
नवी दिल्ली |
दिल्लीतील न्यायालयाने भाजपाचे प्रवक्ते संबित पात्रा यांच्याविरोधात एफआयआर नोंदवण्याचे आदेश दिले आहेत. दिल्लीचे मुख्यमंत्री अरविंद केजरीवाल यांचा खोटा व्हिडिओ सोशल मीडियावर पोस्ट केल्याप्रकरणी संबित पात्रा यांच्याविरोधात एफआयआर नोंदवण्याचे आदेश न्यायालयाने दिले आहेत. आम आदमी पार्टीने संबित पात्रा यांच्यावर व्हिडिओशी छेडछाड करून अरविंद केजरीवाल यांची प्रतिमा खराब केल्याचा आरोप केला होता.
मिळालेल्या माहितीनुसार, या वर्षी जानेवारी महिन्यात आम आदमी पार्टीने भाजपाचे राष्ट्रीय प्रवक्ते संबित पात्रा यांच्याविरोधात मुख्यमंत्री अरविंद केजरीवाल यांचा कथित बनावट व्हिडिओ सोशल मीडियावर पोस्ट केल्याबद्दल दिल्ली पोलिसांकडे तक्रार दाखल केली होती. संबित पात्रा व्यतिरिक्त हा व्हिडिओ दिल्ली भाजपाच्या अधिकृत ट्विटर हँडलवरूनही ट्विट करण्यात आला आहे. भाजपा प्रवक्ते संबित पात्रा यांनी त्यांच्या ट्विटर हँडलवरून एक व्हिडिओ शेअर केला आहे ज्यामध्ये अरविंद केजरीवाल तीन नवीन कृषी कायद्यांचे कौतुक करताना दाखवले आहेत. या व्हिडिओमध्ये ते या कायद्यांचे गेल्या ७० वर्षातील क्रांतिकारी पाऊल असल्याचे सांगत होते. यावर आम आदमी पक्षाने आक्षेप घेत हा व्हिडिओ चुकीचा असल्याचे म्हटले होते.