EVM म्हणजे ‘एव्हरी व्होट टू मोदी’!: मुख्यमंत्री योगी आदित्यनाथ

गोरखपूर: सध्या ईव्हीएमचा अर्थ ‘एव्हरी व्होट टू मोदी’ असाच झाला आहे, असं प्रतिपादन करत आज उत्तर प्रदेशचे मुख्यमंत्री योगी आदित्यनाथ यांनी पराभवाचे खापर ईव्हीएमवर फोडणारे उत्तर प्रदेशचे माजी मुख्यमंत्री अखिलेश यादव आणि दिल्लीचे मुख्यमंत्री अरविंद केजरावाल यांच्यावर जोरदार निशाणा साधला.
उत्तर प्रदेश विधानसभा निवडणुकीनंतर दिल्लीतील तीन महानगरपालिकांच्या निवडणुका झाल्या. या निवडणुकीतही उत्तर प्रदेशप्रमाणे भाजपला प्रचंड बहुमताने विजय मिळाला. दिल्लीकरांनी भाजपवर विश्वास दाखवला. याचं संपूर्ण श्रेय पंतप्रधान नरेंद्र मोदी यांच्या नेतृत्वाला जातं. मोदींनी जागतिक पातळीवर भारताची प्रतिमा उंचावली आहे आणि त्यामुळेच आज प्रत्येक मत मोदींसाठी होत आहे. ईव्हीएमचा अर्थच ‘एव्हरी व्होट फॉर मोदी’ असा झाला आहे, असे योगी म्हणाले. ते गोरखपूर येथे कार्यकर्त्यांना मार्गदर्शन करत होते.
काही लोक पराभवाचं खापर ईव्हीएमवर फोडत आहेत. ईव्हीएमवर आक्षेप घेतला जात आहे. मात्र त्यात काहीच तथ्य नाही हे निवडणूक आयोगाने स्पष्ट केले आणि जनतेनेही ते दाखवून दिले आहे, असा टोला योगींनी ईव्हीएमवर आक्षेप घेणाऱ्यांना लगावला.