एकनाथ शिंदे गुजरातमध्ये, शिवसेनेचे टेन्शन वाढले; संजय राऊतांनी रद्द केला दिल्ली दौरा
मुंबईः शिवसेनेचे नेते व महाविकास आघाडीतील मंत्री एकनाथ शिंदे (Eknath Shinde) नाराज असल्याची चर्चा असून ते सध्या गुजरातमध्ये असल्याची चर्चा आहे. एकनाथ शिंदे यांच्यासोबत शिवसेनेतील ११ आमदार असल्याचंही बोललं जात आहे. शिवसेनेत घडत असलेल्या या नाट्यमय घडामोडींनंतर पक्षाचे प्रवक्ते संजय राऊत (Sanjay Raut)यांनी दिल्ली दौरा रद्द केला असून ते आता मुंबईतच थांबणार आहेत. (Sanjay Raut delhi tour)
विधानपरिषदे निवडणुकीचं मतदान पार पडल्यानंतर सोमवार संध्याकाळपासून शिवसेनेचे नाराज आमदार गायब आहेत. पक्षाकडून त्यांना संपर्क करण्याचा वारंवार प्रयत्न करण्यात येत आहे. एकनाथ शिंदे आपल्या समर्थक आमदारांसह गुजरातमध्ये असल्याची माहिती समोर येत आहे. एकनाथ शिंदे नॉट रिचेबल असल्याने शिवसेनेच्या गोटात खळबळ उडाली आहे. पक्षातील या नाराजी नाट्याच्या पार्श्वभूमीवर संजय राऊत यांनी आपला दिल्ली दौरा रद्द केला आहे.
राष्ट्रपती निवडणुकीसाठी शरद पवारांनी आयोजित केलेल्या बैठकीसाठी आज संजय राऊत दिल्लीला रवाना होणार होते. मात्र, एकनाथ शिंदे यांच्या नाराजीनाट्यानंतर राऊतांनी दिल्ली दौरा रद्द करत महाराष्ट्रात थांबणार आहेत. शिवसेनेत फूट पडली असल्याच्या चर्चानंतर आता पक्ष डॅमेज कंट्रोलसाठी काय पाऊलं उचलणार हे पाहणं महत्त्वाचं ठरणार आहे.
विधानपरिषद निवडणुकांचे मतदान पार पडल्यानंतर मुख्यमंत्री उद्धव ठाकरे यांनी मध्यरात्री १२.३० वाजता वर्षा बंगल्यावर आमदारांची बैठक घेतली होती. मात्र, या बैठकीसाठी शिवसेनेचे १३ आमदार गैरहजर होते. पक्षाकडून या आमदारांना वारंवार संपर्क करण्यात येत होता. त्यानंतर आज सकाळी १० वाजता पुन्हा आमदारांना बोलावणं धाडलं आहे. या बैठकीला तरी आमदार उपस्थित राहणार हे पाहणं महत्त्वाचं ठरणार आहे. दरम्यान, एकनाथ शिंदे नॉट रिचेबल असण्याने शिवसेनेतील अंतर्गंत कलह चव्हाट्यावर आला असल्याची चर्चा सुरू आहे.
एकनाथ शिंदे गुजरातमध्ये
गुजरातमधील सूरतमधील हॉटेलमध्ये एकनाथ शिंदे आमदारांसह मुक्कामी असल्याचं बोललं जात आहे. एकनाथ शिंदे यांना फोनवर संपर्क केल्यानंतर गुजराती भाषेतील टोन ऐकू येत आहे. त्यामुळे ते गुजरातमध्ये असल्याची चर्चा सुरू आहे. तसंच, शिंदे यांचा मुक्काम असलेल्या मेरिडियन हॉटेलबाहेर गुजरात पोलिसांचा बंदोबस्त तैनात करण्यात आला आहे.