डॉ. पायल तडवी आत्महत्या प्रकरणः आरोपमुक्तीसाठी डॉक्टरांचा न्यायालयात आता नवा दावा

 ‘डॉ. पायल तडवी ही निराशेच्या गर्तेत होती आणि कामाचा ताण तिला सहन होत नव्हता. म्हणूनच तिने स्वत:चा जीव घेण्याचे टोकाचे पाऊल उचलले’, असा दावा करत या प्रकरणातील आरोपी डॉ. भक्ती मेहेर व डॉ. अंकिता खंडेलवाल यांनी आरोपमुक्तीसाठी मुंबई सत्र न्यायालयातील विशेष न्यायालयात धाव घेतली आहे. न्यायालयाने त्यांच्या अर्जातील मुद्द्यांबाबत उत्तर देण्याचे निर्देश सरकारी पक्षाला देऊन सोमवार, १८ एप्रिलला सुनावणी ठेवली आहे.

पदव्युत्तर वैद्यकीय अभ्यासक्रमाच्या द्वितीय वर्षात शिकणाऱ्या डॉ. पायलने २२ मे २०१९ रोजी नायर रुग्णालयाच्या वसतिगृहातील तिच्या खोलीत गळफास घेऊन आत्महत्या केली होती. पदव्युत्तर शिक्षण घेत असलेल्या डॉ. भक्ती, डॉ. अंकिता व डॉक्टर हेमा अहुजा या तिघींनी जातिवाचक शेरेबाजी करून रॅगिंग करत तिला आत्महत्येस प्रवृत्त केले, असा आरोप आहे. भक्ती व अंकिताप्रमाणे हेमाने अद्याप आरोपमुक्तीसाठी अर्ज केलेला नाही. या तिघींना मुंबई उच्च न्यायालयाने ९ ऑगस्ट २०१९ रोजी जामीन मंजूर केला. तेव्हापासून त्या जामिनावर आहेत.

‘मला या प्रकरणात गोवण्यात आले असून पायलला आत्महत्येस प्रवृत्त केल्याचे आरोप सिद्ध होणारे कोणतेही पुरावे नाहीत. त्याचप्रमाणे अनुसूचित जाती व जमाती (छळवणूक प्रतिबंधक) कायदा आणि महाराष्ट्र रॅगिंग प्रतिबंधक कायद्यांतर्गतच्या आरोप सिद्ध करणारेही पुरावे नाहीत. पायलला टोकाचे पाऊल उचलण्यासाठी मी जाणीवपूर्वक प्रयत्न केले, असेही सिद्ध होत नाही. व्हॉट्सअॅप ग्रुपमधील आमच्या संभाषणांतूनही पायलचा अपमान केल्याचे स्पष्ट होत नाही. त्यामुळे मला या प्रकरणातून आरोपमुक्त करावे’, असे म्हणणे अंकिताने अॅड. वैभव जगताप यांच्यामार्फत अर्जात मांडले आहे. अशाच आशयाचे म्हणणे भक्तीनेही तिच्या अर्जात मांडले आहे.