नाशिक |
महापालिका क्षेत्रातील आर्थिक दुर्बल घटकांसाठीच्या घरांच्या सातशे कोटींच्या म्हाडाच्या घोटाळ्याच्या चौकशीला सुरुवात झाली आहे. या प्रश्नी मंगळवारी (दि.२९) चौकशी निर्णय घेण्यासाठी विधानपरिषदेचे सभापती रामराजे निंबाळकर यांच्याकडे बैठक होणार आहे. या बैठकीत माहिती देण्यासाठी आयुक्त पवार यांनी सोमवारी दिवसभर तयारी केली. सभापती या प्रकरणात जो निर्णय देतील, त्यानुसार कारवाई केली जाईल, अशी माहिती पवार यांनी दिली.
महापालिका हद्दीत गोरगरिबांसाठी हक्काचे घर असावे, म्हणून अर्थिक दुर्बल घटक (ईडब्लूएस) तसेच अल्प उत्पन्न गटासाठी (एलआयजी) प्रवर्गासाठी राखीव असलेल्या सात हजार सदनिका म्हाडाकडे हस्तांरीत न करता सुमारे सातशे कोटींचा घोटाळा झाल्याचा आरोप गृहनिर्माण मंत्री जितेंद्र आव्हाड यांनी केला होता. त्यानंतर विरोधी पक्षनेते प्रवीण दरेकर यांनी विधानपरिषदेत यासंदर्भात लक्षवेधी सादर केली होती. यावेळी आव्हाड यांनी आरोपात तथ्य असल्याचे सांगितले. सभापती राम राजे निंबाळकर यांनी चौकशीसह आयुक्तांना पदावरून हटवण्याचे आदेश दिले. त्यामुळे आयुक्त कैलास जाधव यांची बदली होऊन त्यांच्या जागेवर मुंबई महापालिकेचे सहाय्यक आयुक्त रमेश पवार यांनी आयुक्तपदी नियुक्ती झाली. त्यानंतर या प्रकरणाच्या चौकशीची तयारी राज्य सरकारने सुरू केली आहे. या प्रकरणाची चौकशी न झाल्यास केवळ जाधव यांना हटवण्यासाठी म्हाडाशी संबंधित सदनिकांचा मुद्दा पुढे केला होता, अशी बदनामी भाजप व राष्ट्रवादीची होण्याची शक्यता आहे. त्यामुळे चौकशीसाठी मंगळवारी (दि. २९) बैठक होणार आहे.
