breaking-newsताज्या घडामोडी
#CoronaVirus: सोलापुरात आढळले कोरोनाबाधित १४ नवे रूग्ण
सोलापुरात आज रविवारी सायंकाळपर्यंत करोनाबाधित नवे १४ रूग्ण आढळून आले. त्यामुळे एकूण रूग्णसंख्या १२८ वर जाऊन पोहोचली आहे. आतापर्यंत ग्रामीण भागातील दोन रूग्णांचा अपवाद वगळता आढळून आलेले सर्व रूग्ण शहरातील दाट लोकवस्त्यांच्या झोपडपट्टी भागातील राहणारे आहेत. आज दिवसभरात बापूजीनगरातून चार तर रेस्ट-न्यू ति-हेगाव येथे तीन रूग्ण आढळून आले. शास्त्रीनगरात दोन रूग्ण सापडले. अद्याप १९३ रूग्णांचे वैद्यकीय चाचणी अहवाल प्राप्त व्हायचे आहेत. दरम्यान, एकूण रूग्णांमध्ये सहा मृतांचा समावेश आहे. तर यशस्वी उपचारानंतर करोनावर मात करणाऱ्या १९ व्यक्तींना पाठविण्यात आले आहे. सध्या १०३ रूग्णांवर छत्रपती शिवाजी महाराज सर्वोपचार शासकीय रूग्णालयात उपचार सुरू आहेत.