breaking-newsTOP Newsताज्या घडामोडीपुणे

मनोरुग्णालयात करोनाचा कहर; ४१ जणांना करोनाची लागण

पुणे । प्रतिनिधी

येरवडा प्रादेशिक मनोरुग्णालयातील दोन क्रमांकाच्या वॉर्डात एकाच दिवशी तीस रुग्णांना करोनाची लागण झाली आहे. आतापर्यंत सुरक्षित असणाऱ्या महिला विभागातही करोनाचा शिरकाव झाला असून, तेथील अकरा महिला रुग्णांना करोनाची बाधा झाल्याचे समोर आले आहे. मागील आठवड्यात निरीक्षण वॉर्डातील अकरा मनोरुग्णांना करोना झाला होता. यामुळे मनोरुग्णालयात दिवसेंदिवस करोनाचा संसर्ग वाढू लागल्याने प्रशासनाची झोप उडाली आहे. खबरदारी म्हणून सध्या दररोज रुग्णांची तपासणी करण्यात येत आहे.

शहर आणि जिल्ह्यात करोनाचा प्रादुर्भाव वाढत आहे. या पार्श्वभूमीवर आता मनोरुग्णालयातही करोनाचा संसर्ग पसरू लागला असल्याचे समोर आले आहे. मागील आठवड्यातच विलगीकरण वॉर्डातून निरीक्षण वॉर्डात हलविण्यात आलेल्या अकरा रुग्णांना करोना झाल्याचे समोर आले होते. त्यामुळे प्रशासनाने तातडीने रुग्णांना विलगीकरण वॉर्डात हलवून उपचार सुरू केले आहेत. एकाच वेळी अकरा रुग्ण बाधित झाल्याने प्रशासन चिंतेत असताना सोमवारी दोन क्रमांकाच्या वॉर्डातील १७० रुग्णांची करोना चाचणी करण्यात आली. यामध्ये ३० जण करोना पॉझिटिव्ह आढळले. त्यांना तातडीने विलगीकरण वॉर्डात हलविण्यात आले आहे. मंगळवारी महिला विभागातील रुग्णांची चाचणी केली असता अकरा महिला करोनाबाधित आढळून आल्या. त्यामुळे प्रशासनाने तातडीने महिला विभागातही करोनाच्या रुग्णांसाठी स्वतंत्र विलगीकरण वॉर्डची उभारणी केली असून, तेथे रुग्णांवर उपचार सुरू केले आहेत. गेल्या चार दिवसांत ५२ मनोरुग्णांना करोना झाला आहे. तसेच, फिट वॉर्डात काम करणाऱ्या एका कर्मचाऱ्याचा मंगळवारी करोनामुळे मृत्यू झाला आहे. करोनाचा प्रादुर्भाव वाढत असल्याने आरोग्य यंत्रणेची झोप उडाली असून, डॉक्टर, नर्स आणि कर्मचाऱ्यांच्या सुट्ट्या रद्द करण्यात आल्या आहेत.

‘सर्व मनोरुग्णांची चाचणी करणार’

‘मनोरुग्णालयात गेल्या आठवड्यात अकरा रुग्णांना करोना झाल्यानंतर सोमवारी दोन क्रमांकाच्या वॉर्डातील तीस रुग्णांना आणि मंगळवारी महिला विभागातील अकरा महिला रुग्णांना करोना झाल्याचे समोर आले आहे. करोनाबाधित महिला व पुरुष रुग्णांसाठी दोन स्वतंत्र विलगीकरण कक्ष स्थापन करून उपचार केले जात आहेत. गेल्या काही दिवसांपासून रुग्णालयात करोनाचा संसर्ग वाढू लागल्याने प्रशासनाकडून दररोज रुग्णांची ऑक्सिजन आणि तापमान तपासणी करण्यात येत आहे. याशिवाय रुग्णालयातील सर्व रुग्णांची करोना चाचणी करण्यात येणार आहे,’ असे वैद्यकीय अधीक्षक डॉ. अभिजित फडणीस यांनी सांगितले.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button