युरोपमध्ये १ डिसेंबरपर्यंत कोरोनाने २ लाख लोकांचा मृत्यू होण्याची भीती
पॅरिस – डब्ल्यूएचओ अर्थात जागतिक आरोग्य संघटनेने युरोपियन देशांमध्ये यावर्षी १ डिसेंबरपर्यंत सुमारे २ लाख ३६ हजार लोकांचा कोरोनामुळे मृत्यू होऊ शकतो अशी भीती व्यक्त केली आहे. कारण सध्या कोरोनाच्या डेल्टा व्हेरिएंटने युरोपियन देशांमध्ये अक्षरशः धुमाकूळ घातला आहे. युरोपमध्ये लसीकरणाच्या गतीमध्येही मंदी आली आहे.
जागतिक आरोग्य संघटनेने काही युरोपियन देशांच्या वतीने बूस्टर डोस सुरू करण्यास नकार दिला होता. मात्र जागतिक आरोग्य संघटनेच्या युरोप शाखेच्या प्रमुखाने असे म्हटले आहे की, ते अमेरिकन सरकारच्या शीर्ष संसर्गजन्य रोग तज्ज्ञांच्या मताशी सहमत आहेत. कोरोना लसीचा तिसरा डोस अतिसंवेदनशील लोकांचे संसर्गापासून संरक्षण करण्यास मदत करू शकतो, असे त्यांना वाटते. संक्रमणाचा उच्च प्रसार अत्यंत चिंताजनक असल्याचे सांगून डॉ. हंस क्लुगे म्हणाले की, युरोप क्षेत्रात समाविष्ट असलेल्या ५३ देशांपैकी ३३ देशांमध्ये गेल्या एका आठवड्यात १० टक्के किंवा त्याहून अधिक वाढ झाली आहे. ब्रिटनमध्ये १२-१५ वयोगटातील मुलांचे लसीकरण करण्याची तयारी केली जात आहे. मात्र देशातील लस सल्लागार समितीने या लसीकरण मोहिमेला अद्याप मान्यता दिलेली नाही. देशाच्या बहुतांश भागांमध्ये नवीन शैक्षणिक वर्ष सुरू होत असल्याने शाळांमध्ये लस देण्यास तयार असल्याचेही आरोग्य विभागाने म्हटले आहे. सप्टेंबरमध्ये शाळा उघडणार आहेत आणि याच काळात ब्रिटनमध्ये कोरोना विषाणू संसर्गाचे प्रमाण आणखी वाढेल, असे बोलले जात आहे.