मध्य रेल्वेचा रविवारी विशेष ट्रॅफिक आणि पॉवर ब्लॉक, पाहा रेल्वे गाड्यांची स्थिती कशी असणार
मुंबई : मध्य रेल्वे मुंबई विभाग दिवा स्थानकावरील जुनी रूट रिले इंटरलॉकिंग इमारत पाडून आणि अप आणि डाऊन जलद मार्ग स्लीव्हिंगचे काम, ओएचई स्लीव्हिंग आणि क्रॉस ओव्हर पॉइंटच्या कामासाठी विशेष ट्रॅफिक ब्लॉक घेणार आहे. त्यामुळे रविवारी गाड्यांच्या वेळात काही बदल करण्यात आले आहेत.
ठाणे-कल्याण अप आणि डाऊन जलद मार्ग- सकाळी 09.00 ते रात्री 09.00 पर्यंत
छत्रपती शिवाजी महाराज टर्मिनसवरून सकाळी 07.55 ते संध्याकाळी 07.50 या वेळेत सुटणाऱ्या डाऊन जलद लोकल मुलुंड/ठाणे आणि कल्याण स्थानकांदरम्यान डाऊन धीम्या मार्गावर वळवण्यात येतील आणि त्यांच्या निर्धारित थांब्यानुसार स्थानकावर थांबतील आणि निर्धारित वेळेच्या 10 ते 15 मिनिटे उशिरा पोहोचतील.
सकाळी 08.30 ते रात्री 09.12 पर्यंत कल्याणहून सुटणाऱ्या अप जलद लोकल कल्याण आणि ठाणे/मुलुंड स्थानकांदरम्यान अप धिम्या मार्गावर वळवण्यात येतील आणि निर्धारित थांब्यानुसार स्थानकावर थांबतील आणि निर्धारित वेळेच्या 10 ते 15 मिनिटे उशिरा पोहोचतील.
ब्लॉक कालावधीत मेल/एक्स्प्रेस गाड्यांची धावण्याची स्थिती
ब्लॉक कालावधीत छत्रपती शिवाजी महाराज टर्मिनस/दादर येथून सुटणाऱ्या मेल/एक्स्प्रेस गाड्या ठाणे आणि कल्याण स्थानकांदरम्यान 5व्या मार्गावर वळवण्यात येतील आणि निर्धारित वेळेपेक्षा 15 ते 20 मिनिटे उशिराने पोहोचतील.
ब्लॉक कालावधीत छत्रपती शिवाजी महाराज टर्मिनस/दादरला येणार्‍या मेल/एक्स्प्रेस गाड्या कल्याण ते ठाणे/विक्रोळी स्थानकांदरम्यान 6व्या मार्गावर वळवण्यात येतील आणि निर्धारित वेळेपेक्षा 15 ते 20 मिनिटे उशिरा पोहोचतील.
या विशेष मेगाब्लॉकमुळे होणाऱ्या गैरसोयीबाबत प्रवाशांनी रेल्वे प्रशासनास सहकार्य करावे, असे आवाहन करण्यात येत आहे. पायाभूत सुविधांच्या सुधारणांसाठी हे विशेष ब्लॉक आवश्यक आहेत.
