1 डिसेंबरपासून ‘हे’ नियम बदलणार; पेन्शन, LPG, टॅक्स… थेट तुमच्या खिशावर होणार परिणाम
New rules from 1 Dec: १ डिसेंबरपासून देशात अनेक मोठे आर्थिक नियम बदलणार आहेत, ज्याचा थेट परिणाम सामान्य नागरिकांच्या बजेट आणि बचतीवर होण्याची शक्यता आहे. पेन्शन, टॅक्स, एलपीजी (LPG) आणि हवाई इंधन (ATF) दरांशी संबंधित हे बदल लागू होणार आहेत. त्याचबरोबर, काही अत्यंत महत्त्वाची कामे पूर्ण करण्याची अंतिम मुदत ३० नोव्हेंबर आहे. त्यामुळे, नागरिकांनी वेळेत तयारी करणे आवश्यक आहे.
३० नोव्हेंबरपर्यंत पूर्ण करावी लागणारी महत्त्वाची कामे –
१. NPS ते UPS: पेन्शन स्कीम बदलण्याची अंतिम मुदत –
जे केंद्र सरकारी कर्मचारी नॅशनल पेन्शन स्कीम (NPS) मधून युनिफाइड पेन्शन स्कीम (UPS) मध्ये बदल करू इच्छितात, त्यांच्यासाठी आता काहीच दिवस उरले आहेत. या स्कीममध्ये शिफ्ट होण्यासाठी ३० नोव्हेंबरपर्यंत CRA पोर्टलवर ऑनलाइन अर्ज करणे किंवा संबंधित नोडल ऑफिसरकडे फॉर्म जमा करणे अनिवार्य आहे. या तारखेनंतर ही विंडो बंद होईल
२. टॅक्स फाइलिंगची डेडलाईन
टॅक्सपेयर्ससाठी (Taxpayers) देखील ३० नोव्हेंबर ही तारीख महत्त्वाची आहे. या तारखेपर्यंत ऑक्टोबर महिन्यातील TDS स्टेटमेंट (कलम १९४-IA, १९४-IB, १९४M आणि १९४S) जमा करणे आवश्यक आहे. तसेच, ज्यांना ट्रान्सफर प्राइसिंग रिपोर्ट (कलम ९२E) सादर करायचा आहे, त्यांनीही हे रिटर्न दाखल करावे लागतील. याव्यतिरिक्त, भारतात कार्यरत विदेशी कंपन्यांच्या उपकंपन्यांसाठी ‘फॉर्म 3CEAA’ जमा करण्याची अंतिम तारीख हीच आहे. वेळेत काम पूर्ण न झाल्यास दंड आणि नोटीसचा सामना करावा लागू शकतो.
३. पेन्शनधारकांसाठी जीवन प्रमाणपत्र
पेन्शन घेणाऱ्यांसाठी ३० नोव्हेंबरची तारीख अत्यंत महत्त्वाची आहे. या तारखेपर्यंत जीवन प्रमाणपत्र (Life Certificate) जमा न केल्यास तुमची पेन्शन थांबवली जाईल. पेन्शनर बँक किंवा पोस्ट ऑफिसमध्ये जाऊन हे प्रमाणपत्र देऊ शकतात, किंवा ‘जीवन प्रमाण’ ॲपसारख्या डिजिटल माध्यमांचा वापर करू शकतात.
हेही वाचा – निवडणुका लढवायच्या की नाही याचा विचार करावा लागेल, आमदार दीपक केसरकर यांचं मोठं विधान
१ डिसेंबरपासून काय बदलेल?
१. LPG गॅस सिलेंडरच्या दरात बदल –
दर महिन्याच्या सुरुवातीला एलपीजी (LPG) गॅस सिलेंडरचे दर सुधारित केले जातात. गेल्या महिन्यात व्यावसायिक सिलेंडर स्वस्त झाले होते. आता १ डिसेंबर रोजी घरगुती एलपीजीचे दर कमी होतात की वाढतात, याकडे सगळ्यांचे लक्ष लागले आहे. दरांमधील बदल थेट घराच्या मासिक बजेटवर परिणाम करेल.
२. हवाई इंधन (ATF) दरात बदल –
१ डिसेंबर रोजी एव्हिएशन टर्बाइन फ्युएल (ATF) म्हणजेच हवाई जहाजाच्या इंधनाच्या दरातही बदल होणार आहे. जर एटीएफचे दर वाढले, तर त्याचा परिणाम म्हणून डिसेंबर महिन्यात विमान तिकीटांचे दरही वाढण्याची शक्यता आहे.
डिसेंबर महिन्याची सुरुवात अनेक महत्त्वपूर्ण आर्थिक बदलांसह होणार आहे. नागरिकांनी ३० नोव्हेंबरपूर्वी सर्व आवश्यक कागदपत्रे आणि औपचारिकता पूर्ण करून घ्यावीत आणि १ डिसेंबरच्या दर बदलांवर लक्ष ठेवावे, जेणेकरून त्यांच्या खिशावर कोणताही अचानक मोठा भार येणार नाही.
