तोंडातून रक्त आणि मानेवर जखमा; बेशुद्ध अवस्थेत फ्लॅटमध्ये आढळली बार गर्ल
नवी मुंबई : बारमध्ये काम करणारी २८ वर्षीय तरुणी फ्लॅटमध्ये जखमी अवस्थेत आढळल्याची घटना उलवे येथे उघडकीस आली आहे. सुलताना खान असं सदर तरुणीचं नाव असून तिच्या चेहऱ्यावर आणि मानेवर जखमा असल्याचं स्पष्ट झालं आहे. याप्रकरणी पोलिसांनी अज्ञात आरोपीविरोधात गुन्हा दाखल केला असून त्याचा शोध घेतला जात आहे.
पोलिसांकडून मिळालेल्या माहितीनुसार, सुलताना खान ही कोपरखैरणे येथील बारमध्ये काम करत होती. तिच्यासोबत काम करणाऱ्या रोहन हेमंत याने तिला वारंवार फोन करूनही ती फोन उचलत नव्हती. त्यामुळे चिंताग्रस्त झालेल्या रोहन याने तत्काळ हेमंत नारंगीकर आणि दिशांत सकपाळ या आपल्या दोन मित्रांसह सुलताना राहत असलेल्या फ्लॅटकडे धाव घेतली. फ्लॅटवर पोहोचताच तिघांनाही मोठा धक्का बसला. कारण सुलताना ही बेशुद्ध अवस्थेत पडली होती.
तोंडातून रक्त आणि मानेवर जखमा
सुलताना खान हिच्या चेहऱ्यावर जखमा झाल्या होत्या. तसंच तिच्या तोंडातून रक्त येत होतं आणि मानेवरही व्रण होते. रोहन हेमंत आणि त्याच्या इतर दोन मित्रांनी तातडीने बेशुद्ध अवस्थेतील सुलतानाला उपचारासाठी रुग्णालयात दाखल केलं आणि पोलिसांना याबाबतची माहिती दिली. सध्या सुलताना ही व्हेंटिलेटर असून तिला वाचवण्यासाठी डॉक्टर प्रयत्नांची पराकाष्ठा करत आहेत.
आरोपीच्या शोधासाठी पोलिसांचे पथक रवाना
बारमध्ये काम करणारी तरुणी जखमी अवस्थेत आढळल्याने परिसरात खळबळ उडाली आहे. पोलिसांनी गुन्हा दाखल करून आरोपीचा शोध घेण्यासाठी विविध पथके रवाना केली आहेत, अशी माहिती पोलीस निरीक्षक पृथ्वीराज घोरपडे यांनी दिली आहे. तरुणीवर हल्ला नेमक्या कोणत्या कारणातून करण्यात आला आहे, हे पोलीस तपासानंतरच स्पष्ट होणार आहे.
