भाजप आमदार मुक्ता टिळक मुंबईच्या दिशेने रवाना, पक्षाला गरज, मी मतदानाला जाणार
पुणे: आज विधानपरिषदेच्या १० जागांसाठी मतदान होत आहे. राज्यसभा निवडणुकीप्रमाणे विधानपरिषद निवडणुकीत देखील भाजप आणि महाविकास आघाडीमध्ये जोरदार चुरस पाहायला मिळत आहे. एका एका आमदाराचे मत महत्वाचे असल्याने सगळ्याच राजकीय पक्षांनी सावध भूमिका घेत आपले आमदार फुटू नये यासाठी काळजी घेतली आहे.
दुसरीकडे, गंभीर आजाराने त्रस्त असलेल्या भाजपच्या पुण्यातील कसब्याच्या आमदार मुक्ता टिळक मतदानासाठी पुन्हा एकदा मुंबईकडे रवाना झाल्या आहेत. पक्षाला गरज असल्यामुळे मी मतदानासाठी जात असल्याचे मुक्ता टिळक यांनी स्पष्ट केलंय. सकाळी साडे सहा वाजता पुण्यातील टिळक वाड्यातून मुक्ता टिळक मुंबईकडे रवाना झाल्या आहेत.
आज विधानपरिषदेसाठी मतदान पार पडत आहे. सर्वच पक्षांनी ताकद पणाला लावली आहे. भाजपने देखील आपली सर्व ताकद लावली आहे. पक्षाने दिलेला आदेश पाळायचा हे आधीपासूनच आमच्या रक्तात भिनलेलं आहे. त्यामुळे पक्षाचा आदेश पाळण्यासाठी मी मुंबईला जात असल्याचं मुक्ता टिळक म्हणाल्या आहेत.
मुक्ता टिळक या गेल्या काही दिवसांपासून आजारी आहेत. राज्यसभा निवडणुकी वेळीही मुक्ता टिळक या मुंबईला मतदानासाठी गेल्या होत्या. त्यावेळी देवेंद्र फडणवीस यांनी राज्यसभेचा विजय मुक्ता टिळक आणि लक्ष्मण जगताप यांना समर्पित केला होता. तर, खासदार अनिल बोंडे आणि धनंजय महाडिक यांनी देखील आपला विजय मुक्ता टिळक आणि लक्ष्मण जगताप यांना समर्पित केला होता.
