Aryan Khan Drugs Case : या सगळ्या प्रकरणाचे मास्टरमाइंड सुनील पाटील! मोहीत भारतीय यांचा खळबळजनक दावा!
मुंबई । प्रतिनिधी
आर्यन खान याला जामीन मिळाल्यानंतर हे प्रकरण काहीसं शांत होत असल्याचं दिसत असतानाच आता भाजपा नेते मोहीत कंबोज-भारतीय यांनी पत्रकार परिषद घेऊन खळबळजनक दावा केला आहे. आर्यन खान प्रकरण, कॉर्टेलिया क्रूजवर टाकलेला छापा आणि त्यानंतरची कारवाई या सगळ्या प्रकरणाचा मास्टरमाईंड सुनील पाटील नावाची व्यक्ती असल्याचा दावा मोहीत भारतीय यांनी केला आहे. त्यामुळे या प्रकरणावरून राज्याच्या राजकीय वातावरणात खळबळ उडाली आहे. आपल्या दाव्याच्या समर्थनार्थ मोहीत भारतीय यांनी सुनील पाटील आणि सॅम डिसूजा यांच्यात झालेल्या व्हॉट्सअॅप संभाषणाचे स्क्रीनशॉट देखील पत्रकार परिषदेत ठेवले.
मोहीत भारतीय यांनी घेतलेल्या पत्रकार परिषद घेऊन सुनील पाटील या सर्व प्रकरणामागचे मास्टर माइंड असल्याचा दावा केला आहे. “के. पी. गोसावीचा फोटो देशभरात चर्चेत राहिला. किरण गोसावी शाहरुखच्या मुलासोबत सेल्फी घेताना दिसला. दुसऱ्या फोटोमध्ये किरण गोसावी भाजपाचा कार्यकर्ता असून आर्यन खानला खेचून एनसीबीमध्ये घेऊन जातोय असं दिसलं. पण या सगळ्या प्रकरणामागचा मास्टरमाईंड सुनील पाटील आहे”, असं मोहीत भारतीय म्हणाले.