महाराष्ट्रातील सर्वपक्षीय नेते मैदान गाजवणार; ५ जाहीर सभांनी राजकीय वातावरण तापणार
मुंबई | मनसे अध्यक्ष राज ठाकरे यांनी मुंबई आणि ठाण्यात जाहीर सभा घेऊन विरोधकांवर टीका केल्यानंतर आता राज्यात राजकीय सभांचे पेवच फुटले आहे. शिवसेना आणि भाजप यांनीही आपल्या प्रतिस्पर्ध्यांचा समाचार घेण्यासाठी जाहीर सभांचे आयोजन केले आहे. विरोधी पक्षनेते आणि भाजपचे नेते देवेंद्र फडणवीस यांची १ मे रोजी, तर मुख्यमंत्री उद्धव ठाकरे यांची १४ मे रोजी जाहीर सभा होणार आहे.
दुसरीकडे महाविकास आघाडीच्या वतीनेही पुण्यात अलका टॉकीज चौकात ३० एप्रिल रोजी एका सभेचे आयोजन करण्यात आले आहे. या सभेला आघाडीतील तिन्ही पक्षांचे नेते आणि मंत्री उपस्थित राहणार आहेत.
मुंबईतील बीकेसी अथवा गोरेगाव येथील एनएससी मैदानावर १४ व १५ मे रोजी शिवसेनेचा मेळावा पार पडणार आहे. या मेळाव्यात शिवसंपर्क अभियानाला सुरुवात होणार आहे. दुसरीकडे देवेंद्र फडणवीस यांचीही १ मे रोजी जाहीर सभा आयोजित करण्यात आली आहे. या सभेत फडणवीस कार्यकर्त्यांना मार्गदर्शन करतील. तसेच सरकारचाही समाचार घेणार आहेत.
दरम्यान, याबाबत अधिक माहिती देताना भाजप नेते आशिष शेलार म्हणाले, ‘१ मे रोजी एक सांस्कृतिक कार्यक्रम आयोजित केला आहे. मुंबईतील सोमय्या मैदानावर हजारो कार्यकर्ते जमणार आहेत. या निमित्ताने फडणवीस यांची ‘बूस्टर डोस’ सभाही होणार आहे.’