ताज्या घडामोडीपुणे

रुबी हॉल क्लिनिकनंतर आता पुण्यातील ‘या’ नामांकित रुग्णालयावर कारवाई

 

 पुणेः ‘रुबी हॉल क्लिनिक’मधील ‘किडनी रॅकेट’च्या संशयाचे लोण आता ससून रुग्णालयापर्यंत पोहोचले आहे. ससून रुग्णालयातील प्रत्यारोपण समितीची चौकशी सुरू करण्यात आली असून, चौकशी पूर्ण होईपर्यंत समितीचे सर्व अधिकार स्थगित करण्याचा निर्णय वैद्यकीय शिक्षण विभागाने घेतला आहे.

अमित साळुंखे या रुग्णाने सारिका सुतार या महिलेला स्वतःची पत्नी म्हणून दाखविलेली कागदपत्रे आणि त्यांच्या विवाहाचे खोटे पुरावे ग्राह्य धरून ससून रुग्णालयाच्या प्रत्यारोपण समितीने किडनी प्रत्यारोपणास परवानगी दिली होती. ‘रुबी हॉल क्लिनिक’मध्ये त्यानंतर प्रत्यारोपण करण्यात आले. सुतार या महिलेला १५ लाख रुपये देण्याचे आमिष साळुंखे यांनी दाखविले होते; पण ते न मिळाल्याने सुतार यांनी फसवणूक झाल्याची तक्रार पोलिसांकडे केली. यावरून रुग्णालयात ‘किडनी रॅकेट’ असल्याचा संशय निर्माण झाला. आरोग्य विभागासह वैद्यकीय शिक्षण खात्याने या प्रकरणाची चौकशी करण्यासाठी समिती स्थापन केली. आरोग्य विभागाने ‘रुबी’विरोधात कारवाई केली. त्यानंतर वैद्यकीय शिक्षण विभागाने ससून रुग्णालयावरही कारवाईचा बडगा उगारला आहे.

‘वैद्यकीय शिक्षण विभागाने ससून रुग्णालयाच्या प्रत्यारोपण समितीच्या चौकशीसाठी जे. जे. मेडिकल कॉलेजच्या तज्ज्ञांच्या अध्यक्षतेखाली चार सदस्यांची समिती स्थापन केली आहे. ससून रुग्णालयाच्या अधिकाऱ्यांसह ‘रुबी हॉल’मधील तज्ज्ञांना चौकशीसाठी मुंबईला बोलाविले होते. त्या वेळी ससून रुग्णालयाच्या समितीकडून संबंधित प्रकरणाची सर्व कागदपत्रे ताब्यात घेण्यात आली आहेत. त्या आधारे ‘ससून’ची चौकशी पूर्ण होईपर्यंत त्यांची प्रत्यारोपण समिती स्थगित ठेवण्याचा आदेश दिला आहे,’ अशी माहिती वैद्यकीय शिक्षण संचालक डॉ. दिलीप म्हैसेकर यांनी ‘मटा’ला दिली.

‘रुबी हॉल क्लिनिक’चा प्रत्यारोपणाचा परवाना आरोग्य विभागाने निलंबित केला. त्यानंतर आरोग्य विभागाने ‘ससून’ची समिती स्थगित करण्याची शिफारस केली होती. त्यानुसार ससून रुग्णालयाच्या प्रत्यारोपण समितीच्या चौकशी समितीचा अहवाल येईपर्यंत प्रत्यारोपण समिती स्थगित केली आहे. अहवाल प्राप्त झाल्यावर पुढील कारवाई करण्यात येईल.

डॉ. दिलीप म्हैसेकर, संचालक, वैद्यकीय शिक्षण विभाग

‘ससून’ची समिती संशयाच्या भोवऱ्यात?

ससून रुग्णालयांच्या कारभाराबाबत वैद्यकीय शिक्षण खात्याकडे अनेक तक्रारी येत आहेत. मात्र, त्या सगळ्या तक्रारी कागदावर यायला हव्या आहेत. त्या तक्रारी कागदावर येत नाहीत. प्रथमच ‘किडनी रॅकेट’संदर्भात तक्रार आल्याने त्याची दखल वैद्यकीय शिक्षण विभागाने घेतली आहे. त्याचाच भाग म्हणून ससून रुग्णालयाची प्रत्यारोपण समिती स्थगित करण्यात आल्याने ही समिती संशयाच्या भोवऱ्यात सापडली आहे.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button