राजद्रोहाचा आरोप, १२ दिवसानंतर भेट, रवी राणांना पाहताच नवनीत राणांच्या अश्रूंचा बांध फुटला!

नवनीत राणा या भायखळा जेलमध्ये होत्या तर रवी राणा हे तळोजा तुरुंगात होते. न्यायालयाने राणा दाम्पत्याला विशेष अटी शर्थींसह जामीन मंजूर केला आहे. रुग्णालयातील वास्तव्य सहन न झाल्याने नवनीत राणा यांना प्रकृती अस्वास्थ्यामुळे मुंबईतील लीलावती रुग्णालयात दाखल करण्यात आले. मानदुखीच्या त्रासामुळे सध्या नवनीत राणा त्रस्त आहेत. आज दुपारपासून त्यांच्यावर मुंबईतीलल प्रसिद्ध लीलावती रुग्णालयात उपचार सुरु आहेत.

• रवी राणांना पाहताच नवनीत राणांच्या अश्रूंचा बांध फुटला

जामीन जरी मिळालेला असला तरी रवी राणा यांना तुरुंगातून सुटण्यासाठी उशीर झाला. आज दुपारी ३ वाजण्याच्या सुमारास ते तळोजा तुरुंगातून बाहेर आले. तिथून ते तडक लीलावती रुग्णालयात पोहोचले. रुग्णालयात आल्यानंतर त्यांनी नवनीत राणा यांच्या तब्येतीची विचारपूस केली. त्यांच्यावर उपचार करत असलेल्या डॉक्टरकडूनही त्यांनी माहितीही घेतली. तत्पूर्वी रवी राणा यांना पाहताच नवनीत राणा यांच्या अश्रूंचा बांध फुटला. त्या धायमोकलून रडायला लागल्या.

रवी राणा यांनी नवनीत राणा यांना जवळ घेऊन धीर देण्याचा प्रयत्न केला. त्यांच्या प्रकृतीविषयी विचारणा केली. तुझ्याबरोबरच आहे, कुठेही जात नाही, असा धीरही दिला. दरम्यान, राणा दाम्पत्यांना जामीन मंजूर करण्यात आला असला तरी, त्यांच्यावर अनेक प्रकारचे निर्बंध लादण्यात आले आहेत. त्यांना संबंधित प्रकरणावर माध्यमांशी बोलता येणार नाही. त्याचबरोबर साक्षीदारांशी कोणत्याही प्रकारे संपर्क साधण्यास अथवा त्यांच्यावर दबाव टाकण्यास मनाई करण्यात आली आहे.