बंगळुरु – कर्नाटक विधानपरिषदेचे उपसभापती एसएल धर्मगौडा यांचा मृतदेह रेल्वे रुळावर आढळल्याने एकच खळबळ उडाली आहे. दक्षिण कर्नाटकातील चिकमगळुर या त्यांच्या मूळगावात हा प्रकार घडला. धक्कादायक बाब म्हणजे मृतदेह सापडलेल्या ठिकाणी धर्मगौडा यांनी मृत्यूपूर्वी लिहून ठेवलेली सुसाईड नोटही सापडली आहे.
जेडीएसचे नेते आणि विधान परिषदेचे उपसभापती धर्मगौडा यांनी आत्महत्या केल्याची घटना सोमवारी मध्यरात्री घडली. चिक्कामागलुरू जिल्ह्यातील कादूरजवळील एका रेल्वे रुळावर रात्री दोन वाजता त्यांचा मृतदेह आढळून आला. या घटनेची माहिती मिळताच पोलिसांनी घटनास्थळी धाव घेतली. यावेळी पोलिसांना सुसाईड नोटही सापडली आहे.
६४ वर्षीय धर्मगौडा हे अलिकडेच चर्चेत आले होते. प्रमुख विरोधी पक्ष असलेल्या काँग्रेसच्या आमदारांनी त्यांच्याशी गैरवर्तन केले होते. बेकायदेशीरपणे सभागृहाचे कामकाज चालवत असल्याचा आरोप काँग्रेसच्या आमदारांनी केला होता. दरम्यान, धर्मेगौडांच्या मृत्यूमुळे कर्नाटकच्या राजकीय वर्तुळात खळबळ उडाली आहे. त्यांचे बंधू एसएल भोजेगौडाही विधानपरिषद आमदार आहेत. कर्नाटकचे माजी मुख्यमंत्री एचडी कुमारस्वामी यांचे ते निकटवर्तीय आहेत.
