श्रीदेवी यांच्या मृत्यूमागे दाऊदचा हात?
नवी दिल्ली : अभिनेत्री श्रीदेवी यांचा मृत्यू अपघाती नव्हता, असा दावा करणारे दिल्लीतील निवृत्त पोलीस अधिकारी वेदभूषण यांनी आता श्रीदेवी यांच्या मृत्यूमागे अंडरवर्ल्ड डॉन दाऊद इब्राहीमचा हात असण्याची शक्यता व्यक्त केली आहे. त्यांच्या या शक्यतेमुळे सध्या गोंधळाचे वातावरण निर्माण झाले आहे.
निवृत्त साहाय्यक पोलीस आयुक्त वेदभूषण सध्या खासगी तपास संस्था चालवत असून काही दिवसांपूर्वीच त्यांनी श्रीदेवी यांचा मृत्यू हा घातपात असण्याची शक्यता व्यक्त केली होती. वेदभूषण यांनी श्रीदेवी यांचा मृत्यू दुबईतील ज्या हॉटेलमध्ये झाला होता तिथे भेट दिली होती. श्रीदेवी यांचा मुक्काम ज्या रूममध्ये होता त्याच्या बाजूच्याच रूममधील बाथटबची पाहणी करून बाथटबमध्ये अशाप्रकारे सहजासहजी व्यक्ती बुडू शकत नाही, असाही दावा त्यांनी केला होता.
दरम्यान, वेदभूषण यांनी आता पुन्हा या विषयाला फोडणी देताना श्रीदेवी यांच्या मृत्यूमागे दाऊदचा हात असण्याची शक्यता वर्तविली आहे. ‘श्रीदेवी यांच्या मृत्यूमागे दाऊदचा हात असू शकतो. दुबईत त्याचे मोठे प्रस्थ आहे. दुबईच्या प्रिंस परिवाराशीही त्याचे चांगले संबंध आहेत’, असेही वेदभूषण म्हणाले. मुख्य म्हणजे वेदभूषण यांनी श्रीदेवी यांच्या मृत्यूबाबत काही धागेदोरे मिळावेत म्हणून दुबईतील जुमैरा अमिरात हॉटेलातही वास्तव्य केले आहे. हे हॉटेल दाऊदच्या मालकीचे असल्याचे सांगण्यात येते. दरम्यान, श्रीदेवी यांच्या मृत्यूचे गूढ उकलावे म्हणून वेदभूषण लवकरच सर्वोच्च न्यायालयातही याचिका दाखल करणार आहेत.