breaking-newsताज्या घडामोडीपिंपरी / चिंचवड
शहरात स्वच्छता गृहाचा अभाव ; महिलांची होतेय अडचण
पिंपरी – शहरामध्ये महिलांसाठी रहिवासी भाग, झोपडपट्टी क्षेत्र, उद्याने आदी ठिकाणी सार्वजनिक स्वच्छतागृहांची उपलब्धता आहे. मात्र, चार प्रमुख बीआरटीएस रस्त्यांवर पुरुष व महिला मिळून केवळ २१ स्वच्छतागृहे आहेत. त्याशिवाय, अंतर्गत रस्त्यांवरही विदारक परिस्थिती पाहण्यास मिळते. या पार्श्वभूमीवर उद्योगांच्या व्यावसायिक सामाजिक जबाबदारी (सीएसआर) उपक्रमांतर्गत शहरातील प्रमुख रस्त्यांवर महिलांसाठी नव्याने काही स्वच्छतागृह उभारण्याचे नियोजन आहे.
सरकारच्या मार्गदर्शक तत्त्वानुसार दर एक किलोमीटरला एक सार्वजनिक स्वच्छतागृह असायला हवे. मात्र, सद्य:स्थितीत याबाबत दुर्लक्ष होत असल्याचे चित्र पाहण्यास मिळते. केंद्र सरकारच्या स्वच्छ भारत अभियानांतर्गत वैयक्तिक घरगुती स्वच्छतागृहांना जास्त प्राधान्य दिले आहे. पुणे-मुंबई महामार्गावर निगडी ते दापोडी या अंतरात निगडी, खराळवाडी, नाशिकफाटा आदी ठिकाणी यापूर्वी सार्वजनिक स्वच्छतागृह उभारलेले आहे. संबंधित रस्त्यासह सांगवी-किवळे, नाशिकफाटा-वाकड, बोपखेल फाटा-आळंदी रस्ता आदी ठिकाणी नव्याने पुरुष व महिला यांच्यासाठी एकूण १८ स्वच्छतागृहे उभारली आहेत. काळेवाडी फाटा-देहू-आळंदी रस्त्यावर सध्या स्वच्छतागृहांचा अभाव आहे. विविध बसथांब्याशेजारी देखील स्वच्छतागृह नाहीत. दरम्यान, शहरात महिलांसाठी सार्वजनिक स्वच्छतागृहे, महापालिका इमारती, उद्याने, अन्य – 455, झोपडपट्टी – 1074, रहिवासी क्षेत्र – 1327, स्वच्छ भारत अभियान – 203 इत्यादीचा समावेश आहे.