पुणे- शहरातील “ई-कचऱ्या’ची योग्य विल्हेवाट लावण्यासाठी “कॉम्प्युटर अँड मीडिया डीलर्स असोसिएशन’ ने पुढाकार घेतला आहे. या संस्थेमार्फत ई-कचरा संकलन मोहीम राबविण्यात येणार आहे. जागतिक पर्यावरण दिनानिमित्त येत्या मंगळवारी (5 जून) उपक्रमास सुरुवात होणार आहे.
संस्थेतर्फे पुण्यातील नागरिकांकडून,कार्पोरेट कंपन्यांकडून कॉम्प्युटरशी निगडीत ‘ई-कचरा’ संकलित करण्यासाठी शहरात 20 ठिकाणी संकलन केंद्रे निश्‍चित केली आहेत. नागरिकांनी कचरा जमा केल्यावर त्यांना त्याची पावतीही देण्यात येणार आहे. हा कचरा पुढे विल्हेवाट लावणाऱ्या कंपन्या घेऊन जाणार आहेत. यामध्ये तीन कंपन्या सहभागी झाल्या आहेत, अशी माहिती ‘सीएमडीए’चे ई-वेस्ट प्रकल्प संचालक रत्नेश राठी आणि माजी अध्यक्ष सुरेश जोशी यांनी दिली. या वेळी संस्थेचे अध्यक्ष नरेंद्र मोदी उपस्थित होते.
केंद्र सरकारने ‘ई-कचऱ्या’बाबत निश्‍चित केलेल्या धोरणानुसारच या उपक्रमाचे नियोजन केले आहे. आम्ही वर्षभर ही केंद्रे सुरू ठेवणार आहोत. नागरिकांना शक्‍य असेल तेव्हा त्यांनी जवळच्या केंद्रात ‘ई-कचरा’ नेऊन देणे अपेक्षित आहे, असे जोशी यांनी सांगितले. स्मार्ट फोन आणि कम्प्युटरच्या युगात ‘ई-कचरा’ हे जागतिक स्तरावरचे मोठे आव्हान बनले आहे. भारतात दरवर्षी सुमारे 30 लाख टन ‘ई-कचरा’ जमा होतो. देशात ‘ई-कचरा’ निर्मितीमध्ये महाराष्ट्र पहिल्या क्रमांकावर आहे. हा कचरा अशास्त्रीय पद्धतीने जाळल्यामुळे आरोग्यावर दुष्परिणाम होत आहेत, त्यामुळे आम्ही हा कचरा थेट कचऱ्याची विल्हेवाट लावणाऱ्या कंपन्यांपर्यंत पोहोचविण्याचे ध्येय निश्‍चित केले आहे, असे राठी म्हणाले.
